近排天氣唔係幾好，又大風又落雨，好彩尋日天公作美，唔單止天朗氣清，仲有陣陣涼風，令一年一度嘅端午節龍舟競渡亦喺各區順利舉行。身為頒獎嘉賓嘅行政會議成員劉皇發、教育局局長孫明揚仲不約而同帶埋一家大細齊齊為一眾健兒吶喊助威，玩得不知幾盡興。
上電視夥拍關禮傑
卓妮知發叔一向重視家庭，尋日帶埋發嬸吳妹姝同五位孫女及一位孫仔齊齊湊熱鬧，場面溫馨。發嬸向來都keep得好好，尋日見佢，睇嚟仲苗條咗唔少，原來佢要做足準備，遲啲上電視拍住關禮傑跳Tango。
發嬸今次係為咗籌款而跳舞，到時喺電視都有得睇，電視台畀發嬸嘅意見，就係肚腩要減肥，咁上鏡至會好睇啲。發嬸乖乖聽話，依家每日只食五分飽，加埋日日練舞，已經瘦咗五磅，不過電視台方面話要再瘦啲，發嬸惟有繼續努力。
講開跳舞，原來發嬸十幾年前已經同一班朋友齊齊學Tango同華爾滋，雖然近年因為搵唔到舞伴同埋內地來嘅舞蹈老師比較複雜，所以無繼續跳，不過仲保留四套舞衣，今次表演可以大派用場。卓妮問發嬸點解唔搵發叔做舞伴，發嬸竟然嫌發叔無咩音樂感，跳得麻麻。不過發叔會以實際行動支持發嬸，已經應承咗會捐十萬贊助發嬸表演，認真唔話得。
孫公睇龍舟享天倫
近日畀臻美黃乾亨學校交還辦學權一事搞到一頭煙嘅孫公，難得可以應節出嚟睇吓龍舟賽事，一於帶埋太太、女兒同外孫仔一齊到場，既支持龍舟健兒，又可以享受天倫之樂，一舉兩得。卓妮見孫公同孫太頻頻為班健兒打氣，睇得不知幾肉緊，當正自己有份落場比賽咁款。孫公個外孫仔不知幾精靈可愛，全程乖乖咁畀媽媽抱住，孫公間唔中又撩吓佢玩，一家樂也融融。
卓妮