好嘢！旺角乾淨晒，因為民政事務局局長曾德成去咗旺角搞衞生。
好嘢！西環乾淨晒，因為公務員事務局局長俞宗怡去咗西環搞衞生。
總而言之，香港十八區全部乾淨晒，因為尋日係「全城清潔日」，特區高官空群而出搞衞生。你知啦，公務員擦鞋系統好神奇㗎，只要知道邊位高官話要落區巡視，方圓幾公里範圍會突然之間自動自覺變得一塵不染。家陣高官唔止巡視咁簡單，直情講到明要落手落腳表演掃街，香港十八區有乜可能唔係乾乾淨淨？
唔好以為高官只係識得扮晒魚蝦蟹表演清潔騷，佢哋都知道持之以恒嘅道理。好似唐唐咁吖，佢話喎，本港雖然成功克服豬流感首輪疫情，但絕對唔能夠鬆懈，全城清潔活動嘅關鍵係持久。冇錯嘞，的確係要持久，如果唔係，今日全城清潔，明日打回原形。問題係，講就容易，政府有冇誠意去做呀？
呢嗱嗱嗱，有一件事真係唔到你唔火滾。○三年沙士疫潮爆發，當時又係全城清潔，高官又係表演掃街，政府更加決定，要喺十八區衞生黑點安裝一百組閉路電視，用嚟監察垃圾蟲。好嘞，閉路電視到底有冇發揮作用呢？事隔六年到底有冇持之以恒呢？民政事務總署居然話喎，由於「後巷衞生情況理想」，所以早於兩年前逐漸移除所有閉路電視。
嘩！咁都得！移除閉路電視已經愚不可及，官員仲要擘大眼講大話，事實上全港後巷十居其九污糟邋遢，冇可能「情況理想」。本報記者巡視曾經安裝過閉路電視嘅衞生黑點，發覺觸目驚心。土瓜灣玉成街同埋鴻福街交界嘅後巷，垃圾堆積如山；深水埗北河街一條後巷，放滿大量雜物；福華街同埋桂林街嘅後巷，更加係坑渠充滿食物殘渣，甚至有豬肉布滿蒼蠅，核突到嘔。
明知後巷污糟邋遢，竟然拆走閉路電視，究竟係乜嘢心態呢？計功夫茶話齋，冇眼屎乾淨盲囉，眼不見為乾淨囉，垃圾睇唔到，即係唔使掃，呢啲就係懶官心態嘞。
所以話啫，一日清潔騷，百日亂糟糟，今次高官表演搞衞生，肯定係有姿勢冇實際，唐唐話要持之以恒，絕對係口噏噏當秘笈。大家試諗諗，沙士咁大鑊，死咗二百九十九人，政府搞衞生都可以咁兒戲，豬流感大話夾好彩暫時安全過渡，懶到出汁嘅官員會咁有義氣幫市民日日掃街？
想香港長期清潔衞生，都唔係話完全冇可能嘅，不過要由唐唐帶頭打一場真真正正嘅持久戰。呢嗱，就咁，唐英年日日落區，巡迴十八區不斷掃街，公務員擦鞋系統就會自動自覺發揮作用㗎嘞。之不過咁，唐唐日日忙於掃街，管理全港樹木防止再有冧樹殺人嘅神聖任務又點算呢？冇辦法嘞，惟有吩咐曾德成或者俞宗怡捱義氣做替工，暫時幫佢負責「守株待冧」。