立法會議員中有唔少媽咪級人馬，李慧琼（Starry）亦係其中之一，尋日母親節當前，Starry企喺土瓜灣街頭，派嘅唔係康乃馨，而係防疫用品，仲一口氣嗌咪近廿分鐘吸引街坊注意。佢話自從跑步練氣後，莫講話叫喊廿分鐘唔使停口，身形都瘦咗成個碼。
Starry尋日聯同一班九龍城區議員喺街頭大派消毒濕紙巾及洗手啫喱，不過港人呢排見得防疫用品太多，即使有免費禮物派，亦未見爭崩頭排長龍，Starry於是攞起個大聲公搏命嗌，足足叫咗廿分鐘至停低飲啖水。問佢有乜方法練到咁長氣，秘訣原來係跑多啲步，日子有功，講嘢都唔會氣喘喎，不過最大收穫仲係踢走全身脂肪，見Starry尋日以貼身牛仔褲示人，就知佢對自己身形有幾滿意。
講起母親節點過，Starry話幾忙都會留番時間畀家人，夜晚約咗老公同六歲囡囡一齊食飯，等住收阿囡畫嘅賀卡喎。