鄉議局主席劉皇發加入行政會議後，鄉議局角色水漲船高，最近獲安排到北京清華大學參加研習班，聽取經濟專家講解如何應付金融海嘯。發叔話，星期二會率領二十多人啟程上京，參加為期六日嘅研習班，相信課程必定對團員有所增值，當然上堂之外仲會見吓領導人啦，至於見乜嘢領導人，現階段仲聯絡緊，還未有定案，相信見國務院港澳辦官員實無走雞。
發叔未出發前，早兩日參加咗粉嶺蓬瀛仙館舉辦嘅「祈求風調雨順國泰民安驅瘟息災經濟繁榮社會和諧陰陽利泰祈福大法會」，為香港市民集福迎祥，祈願環球經濟早日復甦，豬流感疫情早日消散。恒基地產主席李兆基嘅師傅、中國道教協會會長任法融聯同發叔及北區區議會主席蘇西智等嘉賓，共同主持了揭金榜儀式，誠心上香，寓意將參與法會的善信姓名上報天庭，以彰顯善信功德。