上星期，專做汽車保險嘅星輝保險執笠，唔少搵星輝做車保嘅的士大佬真係多得佢唔少。講開為車買保險，立法會議員張宇人（Tommy）有兩架Benz，太太又有一架寶馬，Tommy都無買全保，佢話啲車又唔係新型號，小心啲揸車就已經係最大嘅保障。
同Tommy傾開，至知原來佢以前手車都好辣㗎。當年佢由美國羅省去拉斯維加斯，一出高速公路就揸到時速超過二百公里，好誇張。上得山多終遇虎，Tommy試過因為超速被警察追，最後仲要停牌添。Tommy後來喺美國結婚，因為太太係教師，加上駕駛紀錄良好，兩人合買嘅車保都平啲，幫咗當時仲要供車嘅Tommy慳唔少。有咗太太呢個好榜樣，加上「哦」得多，Tommy揸車愈來愈着重道路安全。
旅發局主席田北俊就話，佢有幫名下嘅車買全保，不過強調「唔係好貴咋」。原來田少啲車保係連埋公司保險，好似火險、水險一次過買，咁大生意，保險公司自然計平啲啦。田少仲話自己揸車好安全，無不良駕駛紀錄，都係車保唔貴嘅原因。