十七位副局長同政治助理上任以嚟，醜聞同負面消息不絕於耳，今個月二十日，就係港府委任呢班政治新丁一周年，適逢當日係星期三立法會大會，有議員特登向港府嘅傷口上撒鹽，提出口頭質詢，要港府交代係咪滿意佢哋嘅表現，呢個問題認真刁鑽，港府點答都死！
十七個副局同政助，人工高到離譜，過去一年，就夾埋用咗納稅人三千五百幾萬元，不過佢哋做咗幾多嘢，市民真係唔多清楚，負面新聞反而歷歷在目，好似商務及經濟發展局副局長蘇錦樑向入境處「蘇卡片」幫菲傭續約、財經事務及庫務局副局長梁鳳儀嘅「用盡彈藥救市」失言引起非議，同埋交通及房屋局副局長邱誠武擺款，錯過平息的士堵塞機場機會咁，真係膾炙人口，街知巷聞。
仲有，副局、政助上任成年，但係民調顯示有九成以上市民噏唔出任何一個副局或政助嘅名字，以咁嘅市民認知度，同做隱形人有乜分別？擴大問責制係政制及內地事務局局長林瑞麟嘅職責範疇，攞住蓋滿黑豬嘅年終成績表上立法會，即係叫林D9當眾受靶啫！