本文重點
港府沉溺抗疫騷，走火入魔，尋日司局長空群而出揸掃把就騷味十足，為疲弱民望吊鹽水，多過真係對付豬流感（Ｈ１Ｎ１甲型流感）。旅遊界立法會代表謝偉俊尋日就透過大氣電波，踢爆港府下令隔離維景，政治考量大於一切，開騷式嘅抗疫措施，更加嚇怕外地人，形同趕客，港府催殘旅遊業，更甚於豬流感。
維景「放監」，無人受感染，港府隨即沾沾自喜，雖無豬流感病徵，但有過度亢奮、腦袋發燒徵狀，人前人後自以為打咗漂亮一仗，點知喺另一個戰場，形勢岌岌可危而懵然不知，真係愚不可及。謝偉俊（阿Paul）尋日敲響警報，指豬流感雖未肆虐香江，但係本地旅遊業已經慘遭蹂躪，過去兩、三個星期，東南亞同台灣團全部停晒，內地團八成止步，唔計零售，單係酒店同接待團等生意，粗略估計，已經唔見咗十億元，搞到咁嘅境地，港府肯定要負相當責任。
動議成立旅遊局
阿Paul喺電台節目指，已故美國總統羅斯福講過：「我哋應該懼怕嘅，就係恐懼本身。」港府因為一名受感染墨西哥人，如臨大敵，強制隔離全幢維景三百幾個旅客同職員，其實形同自製白色恐怖，結果就係自絕旅遊業，事關防範係要做，但係港府硬施「連坐」之刑，困晒幾百人喺一間酒店之內，又要警員同醫護人員全套防毒戰衣上陣，呢啲咪叫過晒火位囉，搞到香港成個疫埠咁款，旅客怕嚟香港之後慘被隔離七日，多過真係怕受感染啦，旅遊業有乜可能唔被搞到半生不死！
阿Paul又踢爆港府匆忙封鎖維景之謎，指港府○三年處理沙士不力，政治受挫，陰影揮之不去，當前七一臨近，時間敏感，港府怕重蹈六年前覆轍，所以咪急急做嘢封維景囉。阿Paul都算一語中的，講中晒煲呔曾嘅心事，亦夠薑有碗話碗，唔怪得阿Paul同師傅詹培忠，一直被港府視為眼中釘啦。
旅遊業係本港四大經濟支柱，不過，港府尋日先至司局總動員揸掃把，繼續沉迷抗疫騷，睇嚟都無乜時間同心思照顧旅遊業，阿Paul後日喺立法會動議，建議港府成立旅遊局，統籌促進旅遊業，到時港府肯定又會動員議會內嘅護航力量，好似對付豬流感咁，封殺議案，真係應該做嘅唔做，唔應該做嘅就做凸，有咁嘅政府，唔好話旅遊業，全香港都唔慌有好日子過。