本文重點
前民政事務局常秘李麗娟係眾人媽打，母親節當然係特別忙碌，卓妮早兩日喺香港會門口見到佢，佢話一早已經約好契仔、契女喺母親節前聚埋一齊飲下午茶，尋日正日，就同自己一對仔女食晚飯慶祝。
八仙嶺山火已經係十幾年前嘅事，媽打唔單止認晒一班行山遇山火嘅學生做契仔契女，咁多年嚟，大家仲有好密切嘅聯絡，對於契仔契女升學搵工，媽打都好落力咁扶佢哋一把，依家見「仔」大「女」大，人人都各有成就，佢真係好安慰。
不過人生總係充滿遺憾，媽打嘅媽咪月前過身，今年唔單止唔可以再同媽媽過母親節，媽打下月卅日佢六十歲生日，媽媽已經唔喺自己身邊，佢都覺得有啲傷感。
女局長揼本落區派花
因為○三年爆發沙士，港府由「清潔大隊長」率領，搞咗個「全城清潔日」。媽打當年最勇，佢唔係做騷，而係着晒全套保護衣進入淘大疫區，係進入淘大嘅最高級官員。依家因為豬流感，港府尋日又搞「全城清潔日」，政府勞師動眾出動司局長各師各法做騷，有局長刻意捲起衫袖、戴上手套左抹右抹，城中兩位女局長仲大打溫情牌，喺母親節「加料」送花，唔知係咪希望挽救吓民望呢？
運輸及房屋局局長鄭汝樺尋日晏晝踩入天水圍天恩邨宣傳全民抗疫，佢一邊向邨民派發口罩等實用嘅防疫用品，一邊趁母親節向媽咪級街坊送花，呢招一出，師奶們果然勁冧。
鄭汝樺又大爆今個母親節收到份驚喜禮物，佢話身在北京讀書嘅大女前日搵專人速遞咗十八支康乃馨送畀佢，令佢又驚又喜，細女就請佢飲茶喎。鄭汝樺都向自己媽咪獻上心意，送上冬蟲草表孝心。
另一邊廂，公務員事務局局長Ｄ姐俞宗怡都唔執輸，佢去中西區視察觀龍樓嘅衞生情況，順便家訪一位八十四歲長者，Ｄ姐除咗動手為婆婆打掃，仲出動巨型花束冧婆婆，夠晒揼本。
卓妮