話說房屋委員會喺○五年將大部分商場及停車場分拆賣畀領匯，以為咁樣就可以甩咗個大包袱。殊不知領匯呢頭上市，嗰頭實行殺雞取卵，不斷瘋狂加租，搞到連大酒樓都叫苦連天，唔少已經被迫關門大吉，小商戶當然更加冇啖好食啦。
最搞笑嘅係，連原本係大業主嘅房屋署都走投無路，自食苦果。原來目前房署仍然有十八個辦事處設喺領匯轄下嘅物業裏面，領匯在商言商，揸正嚟做，六親不認，就算係房署都冇面畀，一樣要交足市值租金！
領匯租金咁乸脷，早已街知巷聞，房署卒之頂唔順要周圍搵碇搬。其中一個喺鴨脷洲邨街市平台嘅房署管理處，經過千挑萬選，終於搵到一個絕世好地方搬，原來佢哋連廁所都唔放過，一於縮小幾格改做管理處，搞到成班職員喺廁所辦公，諗起都反胃。
而另一個位於田灣邨嘅物業服務辦事處被領匯佔咗，房署又要搵地方搬，揀冇可揀，最後要拆咗乒乓波枱，騰出地方做辦事處，認真折墮。嗱，呢啲咪叫做作法自斃囉！
成語中嘅鵲巢鳩佔，嗰隻鵲係心不甘情不願畀隻鳩霸咗個巢，但房署卻係「蠢鵲築巢畀鳩佔」，自己捉蟲，主動引狼入室，唔衰攞嚟衰，最後搞到自己都冇地方踎，真係現眼報！
話時話，有時租金畀多啲唔緊要，一分錢一分貨吖嘛。問題係，領匯成日話要關心社區以及改善服務質素，但自從佢哋接管咗房委會嘅商場及停車場之後，服務唔單止冇乜點改善，玩吓手隨時仲衰過之前添。
好似話屯門大興商場咁吖，行完商場歎完冷氣，即刻走入蒸籠咁熱嘅走廊，一冷一熱玩冰火，一個唔好彩隨時中招！之但係領匯竟然冇諗住改善通風設施，只係求求其其喺走廊位置加設風扇就算。今時今日咁嘅服務態度，簡直令人眼界大開！
仲有呀，有調查發現，領匯對旗下商場都幾大細超㗎。人流多啲嘅大商場設施雖然唔講得好好，至少應有就有吖。但係人流較少嘅中小型商場就陰功咯，有啲仲係「五冇」商場，冇扶手電梯、冇升降機、冇落斜通道、冇輪椅人士洗手間以及冇防滑設施，領匯唔止想踢走小商戶，仲擺到明想踢走埋老弱傷殘添。
近排政府時不時吹風話要出售資產，有學者認為政府可能會將郵政同埋水務私有化。不過，只要睇吓領匯就知，房委會以為過咗海就係神仙，點知搞到房署竇都冇埋，要踎喺廁所辦公。唔好話功夫茶靠嚇，如果郵政同水務私有化，到時郵費貴過電費，水價高過油價，一啲都唔出奇。