政情：醫管局頻失誤道歉停不了

醫管局接二連三發生醫療失誤，繼病人喺明愛醫院門前失救、東區醫院遺失嬰兒屍體等事件後，醫管局又出事，荃灣戴麟趾夫人診所被揭將糖尿病藥同降血壓藥撈亂派畀啲病人，搞到要漏夜打電話通知受影響病人。醫管局主席胡定旭尋日惟有再企出來道歉。肥胡對一連串事故感到非常失望、遺憾同關注，佢話初步調查顯示今次係人為錯誤所致，醫管局會考慮任何懲罰，並對受影響嘅病人道歉。呢幾年醫管局失誤事件幾乎未停過，唔知肥胡幾時先至唔使鞠躬道歉呢？