理工大學早前舉行每兩年一度嘅「第七屆傑出理大校友頒獎典禮」，奧美集團主席兼香港廣告商會主席袁文俊都係六位得獎人之一。原來袁文俊係理大二○○○年工商管理博士課程畢業生，之後仲返理大以兼職形式，任教工商管理碩士嘅市場管理課程。袁文俊作為廣告界翹楚，我哋梗係把握機會問吓廣告業有無受到金融海嘯衝擊啦。
袁文俊就話，金融海嘯對廣告業影響好大，好多公司跌咗百分之十五至廿五嘅生意額，但對廣告界而言，佢話今次其實係有危就有機，事關依家競爭無咁大，反而係爭取市場佔有率嘅好時機。袁文俊以九八年嘅亞洲金融風暴同○三年嘅沙士為例，佢話呢兩次都係經濟危機，但有唔少企業唔單止無收縮開支，反而以進取嘅策略性手法，成功令到品牌更具知名度、更深入民心。
面對金融海嘯嘅衝擊，袁文俊比起好多人嚟講，態度就正面樂觀好多。佢話以前市場好，就好似打順境波咁，好多客戶都以「贏多不變」為原則；反而金融海嘯後大家要打逆境波，唔少客戶要變陣同多作新嘗試，好似多咗人接受數碼廣告，鼓勵業內人士發揮創意。至於金融海嘯幾時完結，袁文俊都話好難答，都係留番畀班金融專家答好啲喎！