尋日係一年一度嘅「饑饉三十」，去年撞正颱風「浣熊」襲港，今年無風但有雨，不過參加人數依然好踴躍，多逾四千人。已經唔記得自己參加咗幾多年嘅民協馮檢基，尋日繼續現身香港仔運動場以行動支持，仲自爆將「饑饉三十」變咗「饑饉十三」。
阿基話自從大約十年前主辦機構邀請佢參加，佢從無間斷地撐呢個活動，不過參加者要三十個鐘唔食嘢，阿基私下自爆只係做到「饑饉十三」，事關佢無信心自己能否捱得到三十個鐘咁耐。其實阿基由前晚開始行動，一直到尋晚都冇嘢落肚，咁都有成差不多廿四小時啦，應該係「饑饉廿四」至啱。
相比之下，身為主禮嘉賓嘅財爺曾俊華就削好多。話說佢要同另外兩位主禮嘉賓一齊敲響戰鼓，事前有專人花十分鐘教佢哋即席綵排，當時鬍鬚曾已經跟唔到節奏，點知上到台更加不濟。上台前鬍鬚曾笠咗件迷彩外套為自己壯膽，點知一開始就高下立見，佢打鼓嗰陣軟手軟腳兼慢半拍，同佢份預算案一樣紓困無力，表現仲差過兩個女嘉賓。