香港青年聯會、菁英會等青年團體尋日搞咗個招聘會，為大專院校畢業生提供六百五十個職位，金融海嘯未過，對大專生嚟講可以話係及時雨。活動主搞手、香港青聯常務副主席陳仲尼話，今年嘅經濟何去何從，自己都睇唔透，奉勸大家謹慎至上。
做開證券生意嘅陳仲尼尋日一直在場主持大局，由早上嘅開幕禮到下午嘅分享會都冇偷懶。但講到今年經濟走向，佢搖晒頭話，去年初佢一早睇淡個市，所以金融海嘯殺埋身，佢雖然有損傷，但損失唔大。今年個市佢就睇唔通，事關近期股市暢旺，但整體經濟似乎尚未甦醒；雖然話股市行先於經濟復甦，佢認為都係唔好過於樂觀！
青聯尋日請咗廠商會立法會議員林大輝同前駐粵辦主任梁百忍同大家分享。大輝話以前都請過人，又喺內地工作過，佢提醒年輕人見工時最緊要表現出自信心，外表談吐都要有自信，仲要盡量發展人際網絡，事關人際網絡好重要，不一定講錢，有時會畀到有用意見。佢又叫年輕人不妨返內地做嘢，因為中港關係日益密切，返去做嘢可學到內地文化、語言同識多啲人，有助未來發展。梁百忍就寄語大家千祈唔好只係以自己為中心，要尊重別人，從人哋個角度出發，咁先會成功。