「天下無不散之筵席」，滙豐總經理梁高美懿下個月就會離開做咗超過三十年嘅滙豐銀行，轉投同屬一個集團嘅恒生銀行懷抱，做「恒生一姐」。不過佢明日開始就會提前到恒生返工，準備同即將退休嘅恒生副董事長兼行政總裁柯清輝交接。尋日梁太依依不捨，最後一次為佢一手湊大嘅「學生營商體驗計劃」做畢業禮嘉賓。
體驗計劃到今年已經係第六屆，由國際成就計劃香港部主辦，梁太回想○三年沙士後，佢見市道好差，遂代表滙豐負責搞呢個活動。佢話初時個計劃好簡單，參加學校只有廿五間，後來愈做愈好，最多有七十五間學校參與，所以整咗個全年最佳學生行政總裁獎，得獎學生可以跟滙豐大班返一日工，學習大班嘅管理技巧。
尋日係梁太最後一次做嘉賓，有學生送咗幅梁太嘅畫像畀佢，貼埋梁太過去六年嘅相，梁太好感動話，呢六年嚟好似湊ＢＢ咁由無到有，依家見個計劃亭亭玉立，希望佢將來能夠持續落去，而且愈做愈好。至於今屆得獎嘅中六學生梁子俊話，咁多銀行大班中，最熟悉梁太，話佢係好少數嘅女銀行大班。