本文重點
我哋早兩日爆過，財政司司長鬍鬚曾日前兩度密會自由黨高層，軟硬兼施游說該黨嘅三名立法會議員支持預算案，但三人至今都未肯答應，未能令預算案脫離危險期。為咗買多兩重保險，鬍鬚曾近日再出陰招，使橫手迫使原定會缺席會議嘅兩名建制派議員現身投票。
立法會將於嚟緊星期三（廿二日）表決預算案，至今已表明支持嘅有民建聯九票、專業會議四票、「3L」三票、「五散人」嘅其中四票同另外六名建制派獨立議員；如果加埋估計最後都會支持嘅工聯會四子，就啱啱好夠三十票。不過，由於民建聯黃容根晨早已定咗喺投票前夕做膝蓋換骨手術，工聯會黃國健（ＫＫ）又要遠赴澳洲出席囝囝嘅大學畢業禮，兩人焗住缺席投票，搞到鬍鬚曾騰晒雞。
點知代表漁農界嘅根哥尋日突然轉口風，話鑑於內地宣布要延長休漁期，對佢嘅業界影響好大，所以通知醫生押後手術，等佢可以全心全意幫佢班選民喎。根哥仲堅稱今次決定係完全自願，唔係受到任何人施壓，又話遲少少做手術對傷勢唔會有影響喎！
不過如果大家聽埋ＫＫ嘅經歷，就會對根哥嘅講法產生好大質疑。ＫＫ話近日有多名好有分量嘅人物，用盡各種方法游說佢支持預算案同留港投票，佢已經向老婆同囝囝「打咗底」，話自己好可能要投完票先起程，唔能夠準時出席本周三舉行嘅囝囝畢業禮，最多只能夠事後再同佢慶祝補數。
ＫＫ：人在江湖 身不由己
ＫＫ早前講過，如果佢連囝囝畢業都甩底，老婆會同佢離婚都似！點知尋日佢好無奈咁嘆咗句：「人在江湖，身不由己。」無計喇，鬼叫囝囝個畢業禮同預算案投票撞到正，佢相信老婆同囝囝都會體諒喎。佢依家嘅唯一希望，就係政府喺最後剩番呢幾日，成功箍多兩三張贊成票，等佢可以如期趕飛澳洲，親身見證囝囝畢業呢個重要時刻。
除咗急召建制派議員歸位，我哋仲聽到鬍鬚曾仲另有陰招，就係喺星期三回應議員時，故意針對個別出位泛民議員，誘使佢哋掟嘢爆粗畀主席趕走，變相減少兩三張反對票。不過有議員就表明，早已諗到鬍鬚曾會使出激將法，佢哋一定會死忍，等到投完票先發難，確保今年份預算案就算勉強通過到，都會成為歷來最多反對票同棄權票嘅一份！