百業蕭條，零售商戶要坐冷板櫈，惟有度橋自救。立法會批發及零售界代表方剛家族嘅時裝王國Toppy集團，上周四（十六日）就為旗下時裝品牌搞時裝騷，搵嚟靚女模特兒加多兩錢肉緊展示09年春夏新裝，前自由黨副主席周梁淑怡（莎姐）同「紗廠大王」王統元女兒梁王培芳都畀面撐場，每人各自豪掟幾千蚊掃貨。經濟點唔好，女人消費力依然強勁！
孖梁王培芳左試右試
卓妮都貢去睇吓呢季興乜衫，撞見莎姐同梁太喺度咬耳仔研究新裝，兩位女士一向愛打扮，睇見靚衫當然咪走雞。莎姐瞄準新裝左試右試，揀足粒幾鐘後決定扑錘買入一批衫裙及套裝，埋單計盛惠七千幾蚊。原來莎姐係方剛嘅「生招牌」，幫襯咗佢哋嘅時裝品牌幾十年，睇怕方生都要畀番筆代言人費至得！
梁王培芳都唔執輸，主攻成熟套裝，係咁易就買咗三千幾蚊衫。兩位阿太隨後兩手Fing Fing離開舖頭，卓妮以為佢哋唔記得攞衫，莎姐輕描淡寫咁話，等司機轉頭幫佢攞，梁太都話抽住啲衫行街唔方便，放喺舖頭先。名媛買衫，又使乜自己抽到一袋二袋咁狼狽呢？
賢內助打骰生意勁升
方剛得阿太以銀彈力撐，笑逐顏開。不過佢坦言，金融海嘯下生意跌咗百分之十至十五，惟有諗計推出多啲優惠。佢又介紹賢內助方太畀卓妮認識，話自從投身立法會後忙到分身不暇，時裝生意轉由經營入口傢俬生意嘅方太打骰。方太賣衫同賣傢俬一樣掂，佢揸旗後舖頭生意額勁升，於是索性全心全意為老公打江山，連傢俬生意都割愛唔做。
所以話呢，每個成功男人背後，一定有個體貼女人，前自由黨主席田北俊有辦你睇。田太負責幫田少管數，等老公衝刺事業無後顧之憂，田少早前掟巨款供滙豐，即使上京開兩會，拍板前都打長途電話同太太密密斟。睇嚟女人要綁住男人個心，除咗識煮兩味之外，總要曉得幫老公分憂先得！
卓妮