有幾筍呀，老細？首先，月薪超過十四萬，即係年薪百幾粒，非常之咁和味。其次，呢份工最筍嘅地方係三個字：冇嘢做。薪高糧準唔使Do，如果你成為超級筍工幸運兒，恭喜你，你絕對可以學似嗰個環保署鹹豬眼高官咁樣，每日用一半時間瀏覽鹹濕網頁。
不過，如果你以納稅人嘅角度睇睇，你就會發覺呢一份超級筍工係戇居嘅，月薪十四萬嘅真正意思其實係每個月掟十四萬落鹹水海。點解咁講呢？因為超級筍工嘅頂頭上司係食物及衞生局局長周一嶽，佢嫌現有一名副秘書長另加十二名助理秘書長級人員唔夠架床疊屋，想話開設多一個副秘書長職位。大家都知啦，周一嶽出晒名周周孭一鑊，而食衞局又響晒朵個個大食懶，結果搞到食物問題多得不得了，衞生問題又多得不得了，醫療醜聞無日無之，開設多一個副秘書長職位有乜用呢？可以改善問題咩？唔好玩啦！
大家唔好唔記得，「食物及衞生局」嘅前身係「衞生福利及食物局」，周一嶽變相燉冬菇，搣柴唔使管「福利」。食衞局要做嘅工作少咗，人手反而要增加，三年內已經加咗兩個首長級職位，計埋今次，係第三個。難怪議員張宇人質疑，局方人手一加再加係消耗納稅人大量金錢。
話時話，之前增設嘅兩個首長級職位係乜東東呢？一個係副局長，一個係食物安全專員。等功夫茶又考考大家，你噏唔噏得出食衞局副局長嘅尊姓大名？如果你口啞啞噏唔出，咁就好嘞，證明你係一個正常嘅香港人。
港大民意研究計劃啱啱做咗一個調查，數據顯示，十七個副局長以及政治助理嘅認知度十分非常極之低，超過九成市民唔知道佢哋係乜哥乜姐。認知度最高嗰個係教育局副局長陳維安，講嘅都只不過係全香港有百分之一點一市民識得佢。至於食衞局副局長咯喎，認知度係百分之零，換言之，透明度係百分之百。功夫茶假設大家有少少好奇心，靜雞雞話你知吖，百分百透明嗰個食衞局「隱形俠」叫做梁卓偉。
講咗咁耐，無非想擺出鐵一般嘅事實，特區政府增聘人手係廢嘅，官場新貴一個二個寂寂無聞，反映市民唔認同，完全感覺唔到呢班白
人工唔做嘢嘅高官對自己有乜幫助。尤其係食衞局，副局長已經係百分百透明，周一嶽浪費公帑夾硬請多個能見度相信一樣極低嘅副秘書長，唔怕隱形俠撞死玻璃人咩？
算罷啦，周局長，人手唔係話唔畀你加，不過應該加嘅係前線人員，並唔係高層冗員。好似瑪麗醫院咁吖，人手短缺到要護士做醫生替工，越俎代庖為病人做乙結腸鏡檢查，無端端增加不必要嘅風險。
食衞局高層肥騰騰，基層瘦奀奀，功夫茶有些少擔心，上重下輕，易失平衡，小心ＰＫ！