傷患未愈嘅勞聯立法會議員李鳳英，早前坐住輪椅都要返立法會主持梁展文專責聆訊，但尋日專責委員會再次開會，英姐就冇嚟到，由委員會副主席李永達頂上，唔通英姐嘅傷勢又惡化？
事實啱啱相反。原來英姐前日返醫院覆診，醫生話佢康復進度理想，首次畀佢唔用輪椅落地行，但就要佢留多幾日院做物理治療，所以佢先至被迫缺席尋日嘅聆訊。專責委員會呢個星期六又會召開新一輪聆訊，首次傳召事件主角梁展文同新世界中國高層作供，據悉英姐當日極可能仲未出到院，要再次缺席會議。
至於下星期三進行嘅預算案投票，正反票數依然好緊湊，英姐到時會唔會出席、如果出席又會投咩票，對結果起咗關鍵作用。據聞英姐至今仍然好口密，連身邊最親嘅人都唔肯透露半句風聲，搞到財政司司長鬍鬚曾同伺機而行嘅建制派心大心細條條Fing！