僱員再培訓局主席個位自從田北辰任滿後，政府唔再委任有政黨背景人士坐呢個位，改為搵個知名度較低嘅「普通人」伍達倫出任，新主席四月一日上任後，尋日隨即同傳媒飯敍介紹吓自己。原來伍達倫相當有來頭，僅碩士學位就有五個，再加埋個工程學博士銜頭，仲未計嗰啲學士學位，真係唔打得都睇得！
伍達倫嘅出身，最體現知識改變命運嘅道理。佢話成世人最鍾意讀書，六二年畢業於理大前身嘅香港工業專業學院，修讀生產工程，本來諗住出國讀書考番個工程師牌，可惜家貧無錢留學，機緣巧合下考到西德政府嘅獎學金留學，名正言順做到工程師，返港後加入前行政立法兩局首席議員鍾士元嘅電子公司，由工程師做到董事，一做就四十幾年。
喺呢幾十年，伍達倫搵到人生另一嗜好，就係讀書，利用公餘時間一口氣攞晒工程學碩士、工商管理碩士、法律碩士，仲攞埋工程學博士銜頭，六十三歲退休之年都走去港大讀番個佛學碩士，今年六十七歲嘅佢仍未夠喉，話想報考公大教育碩士。不過教院未開學，再培訓局呢份工又冇錢收，唔怪得佢自嘲係「雙待老年」。
問伍達倫點解書不離手？佢話讀書夠晒平，幾十蚊買到一本書，相比每次打高球花費幾百蚊，計落抵好多！