本文重點
自由黨前主席田北俊講過，金融海嘯危機下乜都係假，「Cash is King」，見到平嘢都要忍手，但係田少最近自己破咗戒，今個月初喺澳洲用三百幾萬港元購入一隻歲半靚馬，一鋪過使咗一般打工仔十年人工。其實都難怪田少忍唔到手，聽田少講，匹馬比金融海嘯前平咗四成，唔買就認真係對唔住自己！
少年時代已經玩跑車當玩具嘅田少，對養馬一樣有興趣，先後擁有過十匹良駒，依家旗下有隻「現代武士」，幾個月前先至買入，仲未出過賽，加埋澳洲入口呢隻，總共有兩隻。
海嘯大減價
田少四月四日至六日過澳洲，同行仲有佢嘅御用練馬師同其他幾名馬主。田少話，喺金融海嘯之下，今次六百隻候選馬平均減價三成，加上澳元兌港元由海嘯六個半跌到五個半，計一計數，嘩！啲馬比以前減價四成，真係抵食夾大件，於是用三百幾萬港元買下一隻歲半馬，年底抵港為田少効力。按照田少嘅講法，佢今次閒閒哋都慳番一百幾十萬蚊喎。
田少對名下愛駒一向好有愛心，如果馬匹退役，田少會送佢哋返原居地終老，好似最近退役嘅「新東武士」，田少送咗返澳洲頤養天年。咁講法，呢匹新馬都算搵到「好僱主」！