政情：統計處計錯數全城噓爆

政府早前首次宣布啟動巴士票價可加可減機制，研究要求幾間專利巴士公司減車費，小市民拍爛手掌等好消息。點知負責計算方程式數據嘅政府統計處，條數一樣隨時可加可減，尋日政府喺傍晚突然出新聞稿，自我引爆統計處對運輸服務業嘅工資指數出錯，事關處方再計一次，發覺方程式計算結果未達啟動調整票價機制嘅水平，小市民要求減巴士車費嘅好夢頓時成空，全城噓爆！統計處搞出大頭佛，呢鋪咁大鑊，點收科？處長馮興宏就算㩒爆部計數機，睇怕都計唔掂數喇。