政府慳住荷包舉辦東亞運動會，搞到啲比賽場地寒寒酸酸，只屬於「蚊型」國際級水平。立法會民政事務委員會幾位議員尋日去參觀東亞運比賽場地，分別到過紅磡體育館及將軍澳運動場，但係有啲評價有骨落地，港協暨奧委會會長霍震霆無奈話，唔好講話達到國際水平嘞，淨係改善場地設施已經好好，希望透過東亞運改善到設施嘅水平。
新修紅館座位頂腳
卓妮尋日跟埋班議員參觀東亞運場地設施，首站參觀裝修後嘅紅館。雖然觀眾座位換晒新設計，但依然窄到無倫，「雷曼威」甘乃威笑稱：「如果劉秀成坐落唔頂腳，就證明啲座位掂嘞！」可惜「高人一等」嘅劉秀成坐上去後，對腳頂到前面座位冚一冚。雷曼威踩多腳話外牆批盪手工差，廣場地面又凹凸不平，有啲失禮人。
其後幾位議員參觀將軍澳運動場，連運動場設計師都講到好似「巧婦難為無米炊」咁款，話要用三億幾元做到國際級運動場水平，確實係好大挑戰；要在低預算情況下設計到最多座位，都幾考功夫。
澳門已達世界水平
議員表面上似乎好滿意，但作參觀總結發言時先至有骨落地。委員會主席話，雖然投放資源比唔上北京奧運，但起碼能夠畀參賽者有一個國際級比賽場地。
問到有否考察過澳門東亞運動會場地，同香港有乜唔同？霍震霆與劉秀成兩個相視而笑，劉秀成就笑笑口話：「嘻嘻，我都有睇過啦！」但無任何評論。反而小霍大開金口，指澳門東亞運動會設施達到世界水平，對香港構成壓力。佢仲話，香港嘅體育設施只為地區康樂用途，無諗過甚麼國際水平，認真係無話可說！
咁幾時才能達到國際級水平呢？小霍話：「唔好話世界水平啦，我一直都覺得要改進，好多運動都要到內地比賽，好似我哋最優秀嘅單車手阿寶（黃金寶），好多時都要在內地或外國比賽，我哋都講咗好多年喇，希望真係可以透過今次東亞運改善吓設施水平啦！」睇嚟要搞好東亞運，都認真係高難度動作！
卓妮