本文重點
白鴿黨立法會議員黃成智上周日被本報踢爆，佢去年參選立法會期間虛報職業，事發之後即使副主席劉慧卿開到聲叫佢道歉，佢都唔肯出嚟鞠躬。原來佢死頂咁耐，全因白鴿黨一個身兼資深大律師嘅元老錯估形勢。
黃成智一開始就死撐即使冇註冊而自稱社工，都係小事一宗，所以被本報踢爆虛報一事當日，仍然施施然同老婆返深圳旅行，點知玩玩吓就收到元老嘅追魂Call，要佢快啲返香港處理事件。其實黃成智上社工註冊局搞續牌手續前，已經同呢位元老、副主席單仲偕和另一位白鴿黨專用大律師開會，當時呢位元老懶叻咁分析形勢，話事件只屬技術性違規，斷言炒唔大，加上黃成智回覆傳媒查詢時講多錯多，所以元老就建議佢封口，以為咁做可以大事化小，小事化無。
道歉遲咗兩個星期
不過，呢位元老嘅如意算盤完全打錯，事關黃成智去註冊局做Show後，惹來更多市民反感，再加上競爭對手窮追猛打，結果事情愈炒愈大。相對於元老嘅失算，加入白鴿黨冇耐嘅卿姐就睇得出事態嚴重，所以拿拿臨以民主黨名義出道歉聲明補鑊。至於尋日出嚟道歉嘅黃成智，就辯解話私下諮詢過獨立法律意見，大狀叫佢道歉兼尋求寬免，可惜呢個「一舉兩得」嘅建議，足足遲咗兩個禮拜。
其實呢位元老喺政界打滾多年，自己又做過立法會議員，依家出啲山埃建議畀黨友，明顯係佢錯估民意兼忽視作為議員嘅政治責任同政治承擔，變相推黃成智落深坑去送死。不過，黃成智話晒喺政界打滾多年，但連最基本嘅獨立思考能力都冇，人講乜佢就照做，所以就算畀人跣到仆直，都係死有餘辜！