本文重點
講過「Ｎ屆都唔選特首」嘅行政會議召集人梁振英（CY），近呢兩日又被人傳佢準備喺二○一二年落場選特首，今次仲傳佢明刀明槍私下向人表明態度。政治一日都嫌長，何況仲有三年時間，到底CY係咪心急成咁，真係要問佢自己至知。不過，CY多搞作，呢樣就肯定係事實，最近佢又喺自己個Blog度撰文，今次仲玩吟詩抒懷，真係招招有新意。
遍地落紅睹景傷情
CY早前出訪紐約同華盛頓，適逢當地正值櫻花綻放時節，CY變身賞花客，去華盛頓傑佛遜紀念館附近人工湖賞櫻，可惜華盛頓風大，櫻花隨風而逝，遍地落紅，情景蕭瑟，慣於馳騁政商界嘅CY，亦難免睹景傷情，竟然再變身離鄉騷客，沉吟起杜甫《曲江二首‧其一》名句：「一片花飛減卻春，風飄萬點正愁人」以抒情懷。
CY今年五十四歲，情懷不遜花樣少年，都算難得。詩謂：春城無處不飛花。CY尋日去咗日本，唔知佢對東瀛嘅櫻花落紅又有乜感受？睇過兩地嘅櫻花之後，會唔會都係覺得香港禮賓府嘅杜鵑花最合佢眼緣呢？