全國人大常委范徐麗泰上星期五北上，以香港回歸基金信託人身份去廣西，考察扶貧項目進展，同埋探望當地貧窮戶。所謂好人有好報，范太此行見識到「長壽之鄉」瑤族自治縣巴馬人嘅長壽「靈藥」，而且，范太試過都話好！
廣西唔似上海、深圳咁繁華，范太今次仲係深入窮鄉僻壤探貧民，行程唔慌舒服得去邊，日日要坐車幾粒鐘，不過范太好硬淨，尋日佢喺長途電話同我哋講，一啲都唔覺得辛苦，可能係見到村民太熱情，又唱山歌迎賓，又攞晒屋企啲粟米、番薯招呼佢哋，真係令佢好感動。
范太已經唔係十八廿二，咁捱法都無事，唔通長壽「靈藥」真係咁勁？我哋講緊嘅長壽「靈藥」，其實係巴馬出產嘅一種獨特植物，叫做沙蔴。據內地研究，巴馬人每十萬人，就有三十一個百歲人瑞，係百歲老人比例全球最高，當地人將沙蔴磨碎煲湯飲，聲稱食咗會長壽。今次范太去到東蘭縣，就有機會見識得到。范太話，呢幾晚特別好瞓，瞓醒個人又零舍精神，究竟係攰得滯，定係沙蔴發揮效力，連佢自己都搞唔清楚。