立法會調查雷曼事件嘅小組委員會聽日首度傳召金融管理局總裁任志剛出席聆訊，議員都磨拳擦掌靜待好戲上演，被傳九月退休嘅任總能否力保英名，就睇佢嘅造化。小組委員會主席何鍾泰對聽日嘅聆訊亦嚴陣以待，今日仲係復活節假期，但係佢就要返立法會開ＯＴ，同立法會法律顧問同秘書開預備會議，決定要準備充足「恭候」任總。
話自己十三年嚟都無放過假嘅何鍾泰，呢個復活節一樣無假放，早前拍住發展局局長林鄭月娥上四川，跟進重建工程同探訪災民，五日走三個災區，尋日先至返到香港，點知拜任總所賜，今日又要開工。
何鍾泰話，雷曼小組每次開閉門會議或者公開聆訊，佢都要同立法會嘅法律顧問同秘書開預備會議，準備文件，同埋設定議員提問嘅範圍咁，次次都開一至兩個鐘頭，睇嚟今日都唔會例外。何鍾泰就話慣咗年初一都返立法會睇文件啫，立法會秘書處嘅職員要縮短長假期，都幾唔抵。議員、市民等睇戲，難為一干人等要準備好齣戲嘅骨幹，演起上嚟至會有紋有路，至唔會畀任總帶住遊花園。