有票倉之稱的工聯會領導層換屆在即，副會長林淑儀九成九會接替黃國健，紮職做理事長，幾成公開秘密，反而邊個會統率換屆後新成立嘅政務委員會，統籌未來重大選舉，外界更加感興趣。早傳呢個新職會由嫻姐陳婉嫻執掌，但係我哋聽到另一個版本，指鄭耀棠先至係真命天子，工聯以後由會長直接統領呢個軍機架構，擺明車馬喺直選戰場同其他政黨爭一日之長短。
工聯會喺上年九月立法會報捷，除咗勞工界兩個議席袋袋平安，喺直選戰場亦一口氣取下九龍東同新界西兩個議席，分別將黃國健同王國興推入議會。立法會開鑼只係半年，但係工聯內部已經開始醞釀三年後嘅直選部署，而且有意擴大直選版圖，加入新界東同港島戰場，同遠房親戚民建聯一較高下。
葉偉明願戰直選
按工聯規章，勞工界立法會代表不設連任機制，即係話葉偉明同潘佩璆三年後要抉擇係咪轉戰直選。據悉，其中涉足政界已有一段日子嘅葉偉明，已經向工聯高層交心，表明願意三年後出征新界東，即係會同民記劉江華支旗鬥搶親中票源。
潘佩璆未表心迹
至於潘佩璆，據聞仲未向工聯高層顯露心迹，而且，以潘醫生嘅敦厚脾性，願意參加直選泥漿戰嘅機會亦唔大。不過，工聯雄心壯志搞直選，目標就唔止開拓一個新界東議席咁窄小，無論潘醫生意願如何，工聯都會研究開拓港島新區嘅可能性，以後食粥食飯，就睇今個月二十日新領導層誕生之後增設嘅政務委員會。
從時間性同功能性睇，政務委員會嘅揸弗人位置，好似特登幫老大姐嫻姐度身訂造一樣，事關嫻姐自淡出立法會之後，依家喺工聯之內未有新要職，加上嫻姐直選經驗豐富，本來順理成章由佢統領呢個新架構。不過，政務委員會日後儼如工聯會嘅軍機處，掌控調動地區資源實權，消息話，誰人執掌呢部龐大選舉機器，工聯高層仲處於醞釀階段，叫大家唔好睇漏棠哥咁話。
嫻姐日前出席工聯會地區活動時，被記者問起係咪會執掌政務委員會，嫻姐回應話，好支持工聯成立新架構，備戰未來選舉，不過，到依家未有人搵過佢喎。到底嫻姐係刻意低調，定係新架構的確另有人選坐鎮呢？答案相信好快揭盅。