本文重點
經濟不景氣，搵錢要諗計。唔少名人近日磨拳擦掌進軍葵涌食品嘉年華撈一筆，全國政協常委楊孫西賣「大紅袍」，仲豪拋四千幾蚊狂掃茶葉送禮；廠商會會董黃家和就賣健康食品，主動畀折頭，結果生意比工展會多出三成幾。
葵涌食品嘉年華明日係最後一日，卓妮尋日趁復活節假期貢去食品嘉年華湊熱鬧，走咗去楊孫西嘅茶葉檔八吓生意如何，原來佢日前靜雞雞現身攤檔狂掃每盒五百蚊嘅大紅袍，一掃就九盒，唔知係咪用嚟送畀佢兩位福建結拜兄弟、全國政協委員盧文端同施子清呢？楊生買嘢夠晒均真，雖然貴為老闆，但買嘢照樣科足水，小市民恐怕唔敢使得咁豪嘞。
上等大紅袍物以罕為貴
茶葉檔負責人周小姐話，港人對大紅袍較陌生，入貨時多揀最平貨色，即係每両十幾蚊嗰種，不過亦有人一試上癮，返轉頭買兩千幾蚊一両嘅上等貨。何解上等大紅袍咁受名人垂青？
卓妮八到，上等大紅袍一般屬野生茶葉，當中以生長喺兩個峽谷之間嘅大紅袍樹最矜貴，年產量只有兩、三斤，故物以罕為貴；至於平價貨就係來自栽種嘅大紅袍樹，每年產量達幾百斤，價錢自然平一截。
租一個攤檔 反而賺更多
至於廠商會會董黃家和亦小試牛刀，喺場內擺檔賣健康食品同奶茶沖劑等，佢話食品嘉年華人流唔及工展會多，但生意反而多咗三成幾。何解呢？黃生分析話，食品嘉年華每日人流雖然只得三萬幾人，同工展會每日有十萬人相比，入場人數冇咁多，不過佢今次只係租咗一個攤檔，相比工展會同時租四、五個檔，開支少咗一半有多，屈指一算下今次反而賺得更多。
但黃家和坦言，消費者精打細算，買嘢主動開口攞折頭之餘仲要有禮品送，為求留客，佢都要順應民意。佢又話，食品嘉年華反應勝預期，唔排除將來會喺沙田、天水圍、元朗等地方開檔「添食」。
卓妮