你都咪話唔得人驚，雖然呢單恐怖血案發生喺美國，之但係，失業問題全球化，香港嘅新移民出晒名悲情，特區政府一來唔識救市，二來唔肯救人，唔好以為類似情況唔會喺香港發生。
講起嚟真係幾可悲，各國政府夾手夾腳投放幾千幾萬億去挽救金融海嘯、創造就業機會，香港政府呢？你又唔可以話佢哋完全冇做嘢，不過比起人哋嘅雷霆萬鈞，香港政府投放嘅資源係一條毛咁上下囉。高官所謂嘅救市措施，包括撥少少錢畀僱員再培訓局，叫人報讀相關課程，自我增值然後轉型。
再培訓，再上路，再接再厲再戰江湖，如果讀完書真係可以搵到飯食，呢個主意本來都算好過冇嘅。照咁講，再培訓有乜嘢課程提供呀？有冇「年薪百萬副局長空降訓練班」呀？有冇「掃完街做特首速成雞精班」呀？有冇「政務司司長管理樹木轉型班」呀？對唔住，係冇嘅，等功夫茶為大家介紹兩個好盞鬼嘅訓練班。
第一個盞鬼訓練班叫做「個人素養單元證書課程」。齋睇個名，大家估唔估到有乜嘢學呢？抽象成咁，相信大家都係估唔到㗎嘞，開古啦，課程內容係教人認識自我、時間及工作管理、思維以及情緒管理概念、工作態度與操守等等。可能因為課程內容過分虛無縹緲，一直冇乜人吼，收生不足，未能開班。
第二個盞鬼訓練班叫做「就業啟航單元證書課程」，主要係為新移民而設。呢個更加盞鬼，課程內容基本上全無具體技能，導師會教你認識社區資源啦，教你交通網絡啦，帶你跨區參觀啦，介紹香港工作文化咁啦。可以咁講，呢個課程唔係再培訓，而係再搵笨。
喂，「僱員再搵笨局」到底有冇乜嘢實質少少嘅課程㗎？有嘅有嘅，譬如話，你可以報讀「陪月員課程」吖，讀完你就有資格為產婦提供專業陪月服務嘞。問題係，你有資格唔代表你有工作，再搵笨局好大可能介紹你去洗廁所。有一位學員陳太話，二十幾個陪月學員之中，只有四個搵到相關工作，大部分冇辦法學以致用，一係安排去做清潔工，一係連一份工都冇，讀完仍然係失業。
咦，咪住先，局方好自豪咁話，畢業學員嘅就業率高達八成幾喎，冇理由咁多人搵唔到飯食吖。呢嗱嗱嗱，再搵笨局真係有好多方法再搵你笨㗎，佢哋嘅計算方法又係非常之咁盞鬼，只要你做過散工一日，你已經算係就業人士！如果依照呢條再搵笨方程式計算，做過曾蔭權替工幾日嘅唐英年，已經係堂堂特區之首，問你服未！
唉，功夫茶開始有啲啲擔心。曾家班官老爺呀，失業率攀升，再培訓搵笨，新移民悲情，溝溝埋埋好容易情緒失控，如果你哋驚美國恐怖血案喺香港發生，唔好咁笨，出街着多件防彈背心穩陣少少！