阿爺落指令畀煲呔曾，要佢研究香港六大產業嘅發展前景，包括教育產業，煲呔曾將個波交畀口水會經濟機遇委員會。孫公放假外遊，署理教育局局長陳維安尋日上電台講吓政策配合，點知開口就說漏嘴，話本港土地有限，大專院校宿舍不足，人才又唔多夠，三言兩語就數到好多香港先天缺陷和不足，變相摑咗煲呔曾一巴。
陳維安話，香港有三間大學躋身全球首五十間大學排名榜，但香港是彈丸之地，土地供應有先天性局限；大學若要急速發展，又需要足夠人才，政府長遠要從政策及資源投放層面，促進產業發展。
講到被視為人才來源嘅非本地生，陳維安實話實說，話依家八大院校每年取錄一千五百個非本地生，遲啲每年收多一倍，仲會發展自資課程；但大家唔好忘記，各院校所取錄嘅非本地生，大部分係內地生，連陳維安都話要諗計吸引海外學生來港讀大學，甚至讀研究生課程或短期專業術科培訓課程，再唔係就學吓海外嘅大學咁，做足宣傳工夫，先吸引非本地生，再挽留人才留喺香港工作，長遠先可以增加香港競爭力。
不過擺喺眼前都係先天性不足，煲呔曾睇怕都唔好繼續癡人說夢，話要發展甚麼教育產業喇！