本地職業球壇積弱多年，最近仲爆出假波疑雲；相反立法會足球隊喺搞開本地波嘅資訊科技界譚偉豪同廠商會林大輝接手後，就立即一洗頹風，先後三次出戰都未逢敵手，最厲害係連一球波都未失過。有三連勝紀錄壯膽，立會足球隊日前終於向佢哋終極死對頭發出戰書，相約政府高官足球隊下月九日一決高下。
IT豪尋日話，由於呢場波約得早，至今已有八、九名議員答應出戰，包括上幾場都咁啱唔喺香港嘅會計界陳茂波，除非最後有人集體甩底，否則肯定係今屆成軍以來最齊腳嘅一次。佢已經特別提咗政府唔好派啲二打六官員出嚟應戰，最好係清一色政務官，愈多局長愈好。如果局長唔得閒或者「熬底」唔敢披甲上陣，都應該由副局長「署任」，否則咁高人工請佢哋嚟做乜？
煲呔曾最近連番施政失誤，成個政府都超弱勢，面對擁有三連勝戰績嘅強陣立會足球隊，如果唔讓球，一定冇人敢賭！