今屆立法會任期開始咗冇耐，立法會環境事務委員會已經去信內地當局，要求組團訪問珠三角商討跨境環保合作，但畀內地以事忙為由婉拒。最近立法會經濟事務委員會計劃訪問珠三角嘅跨境物流同旅遊設施，就盛傳會獲內地「開綠燈」，委員會內兩名「無證議員」都可望成行，打咗環委會嘅尖。
環委會早前再接再厲，透過立法會秘書長吳文華去信廣東省人大常委會秘書長崔健，要求到曾經發生大型淤泥污染嘅深圳河實地考察，睇吓事故對兩地水質嘅影響。崔秘書長拖咗大半個月後，終於喺上星期一回信，用咗兩頁紙好詳盡咁介紹內地當局採取咗乜嘢跟進行動同改善措施，強調水質現已恢復正常，如須進一步了解情況，可繼續溝通聯繫，即係好婉轉咁再請環委會食多次檸檬。
其實兩個委員會建議嘅訪問議題同樣都冇乜政治敏感性，委員會內嘅「無證議員」數目亦差唔多，最後大家同人唔同命，好可能就因為經委會係由建制派嘅林健鋒做主席，環委會就由公民黨黨魁余若薇做主席。至於到底係余若薇手瓜唔夠硬，定係內地當林健鋒係自己友明益佢，相信當事人都心知肚明！