本文重點
多間銀行最近以金融海嘯為由，延長對美容公司客戶嘅信用卡交易付款期，令大批美容公司面對周轉不靈壓力，引發業界喺尋日發起大遊行，向銀行公會、銀行同政府抗議。遊行最後大約有三百人參加，喺政治上嘅意義本來唔大，奇就奇在參加者當中居然有屬於建制派同工商界嘅自由黨副主席方剛，旁邊當然仲有示威常客泛民分子，相信今次都係呢個組合首次一齊上街抗爭，堪稱近年本地政壇嘅一大奇景。
今次同時現身包括泛民嘅肥仔明（李華明），佢就因為參與過規管美容儀器嘅立法，「不打不相認」咁同美容業混熟咗。而搞開工運嘅阿人之所以參與，主因係職工盟轄下有個美容及美髮業職工會，佢身為職工盟頭頭當然要到場。至於方剛就更加有多個理由，除咗因為美容業係屬於佢代表嘅批發零售界，仲因為佢去年選舉嘅對手，特別喺美容美髮業做咗好多工夫，加上民建聯亦對佢個位虎視眈眈，方剛在公在私自然要加緊做番啲嘢，箍實呢個界別啲票。
其實以前自由黨同泛民偶爾亦對個別議題或政策持相同立場，但一般都係各有各做，盡量劃清界線，例如早幾年前嘅商品稅諮詢，自由黨同泛民都係強烈反對，但就點都唔肯一齊搞遊行，上街都特登要分開兩日做。不過自從去年選舉巨變之後，自由黨無論喺立場定表達方式，都同泛民愈行愈近，例如外傭稅同雷曼專責調查兩項重要表決，兩者都立場一致，依家甚至打破埋一齊上街嗌咪舉牌反政府嘅禁忌，令唔少建制派同政府中人咋舌。
唔怕做反對派
有建制派中人指出，自由黨始終認為佢哋去年嘅選舉失利及之後畀人分化壓迫，多多少少都係同煲呔曾針對該黨有關，因此除非係阿爺高度關注嘅政治議題，否則佢哋都唔怕公開做反對派齊齊倒曾。嚟緊嘅預算案投票，即使阿爺已經出咗聲，方剛同代表飲食界嘅另一自由黨副主席張宇人，據聞都好想唔跟大隊投票；最後兩人係咪企得硬，大家睇多兩個禮拜就知道。