本文重點
英文會話向來係香港學生嘅弱項，回歸十年，港人講「煲冬瓜」多過英文，因為練得少，聽講能力都大倒退。港交所主席夏佳理（Ron）尋日出席一個英語演講比賽，慨嘆港生英文水平跌咗Watt，唔少團體開會都轉講中文少講英文，佢話呢種「重中輕英」嘅文化要扭轉吓至得喎。
阿Ron本身讀番書出身，英文當然「勒勒聲」，卓妮叫佢評吓港人嘅英文水平，佢話唔少人講英文都有個通病，就係先諗中文然後翻譯成英文，好易變成「港式英語」，笑死人！佢醒兩招學英文心得畀大家，就係要變成「英文人」，即係平日多聽多讀多講，睇多啲英文書同聽吓英文新聞報道，進步自然快。
阿Ron話，可惜回歸後，佢覺得香港人想同內地睇齊，少咗講英文，出席團體會議時，見到周圍嘅人寧願講中文都唔講英文，擔心長此落去，港人英文程度會下降，失去國際大都市優勢，所以阿Ron以身作則，平日同阿仔夏嘉康（Max）傾偈都用英文，佢話兒子亦講得一口流利普通話，不過廣東話就差啲，事關阿Ron唔得閒教佢喎。
楊鐵樑痛從口出
同場仲有前首席大法官楊鐵樑，楊官扁嘴皺眉，顯得冇晒心機，原來佢右邊面嘅三叉神經痛近日再度發作，開口講句嘢都痛入心肺，尋日更主動同大會講話取消致辭環節。
其實楊官兩年前已受呢個病困擾，後來搵神醫針灸醫番好，點知近日又再度畀病魔折騰，卓妮喺呢度祝佢早日康復！
卓妮