本文重點
每年三、四月都係日本賞櫻好季節，現時生活優哉游哉嘅自由黨「莎姐」周梁淑怡，日前就同丈夫周明權拍拖去日本關西京都、大阪、神戶及四國島玩自駕遊賞櫻花，又到神戶有馬溫泉區浸溫泉，認真識歎世界。不過，快樂完後，莎姐嚟緊復活節假期就要留喺屋企做主婦執屋嘞！
莎姐與丈夫周明權一年起碼去兩次旅行，去年三月復活節秘密暢遊越南河內，四月又四代同堂一齊去泰國慶祝母親節，去年底聖誕節再到澳洲玩十日。至於今次日本關西賞櫻之旅，由於櫻花生命短暫，盛開約一周就會凋零，所以莎姐話要一早籌備旅程，夾好晒時間，先至欣賞到櫻花盛放嘅壯觀場面。
日本關西好多靚景賞櫻，例如京都有賞夜櫻嘅清水寺和賞山澗櫻花嘅嵐山嵯峨野，大阪市就有大阪城公園，而姬路當然係姬路城啦，可坐在樹底邊賞櫻邊喝茶，仲可以歎吓以櫻花製造嘅糕點美食，實在賞心樂事。
周明權順道取經
今次莎姐賞櫻自駕遊仲加插咗個行程，就係跟丈夫周明權去考察日本橋樑建築結構及技術。莎姐話，丈夫本身做建築，對現代建築有濃厚興趣，去開日本當然順道取經啦，睇吓人哋啲大橋設計，最深刻嘅當然係欣賞到全世界最長嘅瀨戶大橋，橫跨日本瀨戶內海，宏偉得令人驚訝！
瀨戶大橋連接本州嘅岡山縣和四國嘅香川縣，在世界鐵路和公路並用橋中名列第一，全長約三十七公里，較籌建中嘅港珠澳大橋長七公里，難怪周明權要去偷吓師嘞！
卓妮