呢單嘢都幾騎呢，代理商話，「活視康」一九九四年引入本港時，衞生署話唔使註冊。點知衞生署前日卻派員上門，聲稱曾發信通知代理商辦理註冊手續，代理商遲遲唔行動，衞生署先至指令回收。不過代理商就話，一直冇收過衞生署嘅信。口同鼻拗，都唔知邊個係真。
姑勿論邊個講嘅先至係真話，事實係呢種藥物喺香港冇註冊銷售咗十五年，而且包括十七間公立醫院及部分私家醫院中招，衞生署竟然乜都唔知，淨係監管失職，已經罪無可恕啦。
出事之後，衞生署同代理商都話，呢種藥物嘅安全、效能同品質都冇即時問題。好明顯，衞生署又喺度卸責，依家唔係呢隻藥嘅安全有冇問題，而係衞生署有冇監管嘅問題，佢哋懶懶閒，冇註冊嘅藥物都可以賣通街，唔怪得發霉藥、過期藥、無牌包裝藥都可以過到骨啦。最怕嘅係，遲早整出一鑊杰撻撻嘅，到時睇吓嗰班衞生官員有冇眼淚吖。
話時話，點解以前未聽過香港發生咁多藥物問題，依家忽然好似燒炮仗咁，爆完一個又一個呢？其實，以前唔係冇事，而係冇人理，衞生署班官員條條Fing，藥廠變得無王管，話就話設立咗個所謂ＧＭＰ制度（優良藥品生產規範），原來只係紙上監管，睇吓啲紀錄就算數。藥物有冇出事、出咗乜嘢事，佢哋都關人個關。咁搞法，香港有乜法子唔變成問題藥物嘅天堂呢？
最好笑嘅係，港府連藥物都管唔掂，仲話要發展所謂六大優勢產業，第一項就係檢測和認證產業。煲呔曾吹水唔抹嘴，話乜嘢香港已經有一套嚴謹嘅認證制度，要發揮呢種優勢，將香港建成為檢測認證中心。真係唔識嘅就嚇死，識嘅就笑死。
更可怕嘅係，唔單止藥物檢測有問題，食物檢測問題更大。呢幾年，乜嘢毒蛋、毒魚、毒奶粉都流晒入嚟；走私菜就更加唔使講，表面上貼嘅係合格菜場嘅標籤，實際上係掛羊頭賣狗肉，有註冊等於冇註冊，有認證等於冇認證。
功夫茶思疑，煲呔曾都唔知係咪靠害，香港嘅檢測和認證制度一塌糊塗，佢仲夠膽死話要發展乜嘢檢測和認證中心。咪玩啦，如果吹水就可以解決問題，呢份工係人都識做啦！