復活節將至，政界名人紛紛外遊，自稱「Laughing媽」嘅「眾人媽打」前民政事務局常秘李麗娟，準備與相識四十載嘅老同學去新西蘭玩八日，釣魚兼歎葡萄酒。
過去甚少聽媽打有釣魚同飲酒嘅嗜好，原來佢以前去過新西蘭嘅酒莊品嘗白酒，點知一試回味無窮。講到釣魚，威水史就更加一籮籮，佢試過與四十磅三文魚搏鬥。
媽打話，多年前已搞外國釣魚團，通常會去啲大湖泊垂釣，最佳成績曾經釣過一條重達五十磅嘅鱸魚，亦釣過四十磅嘅三文魚，當中以釣三文魚嗰次嘅印象最為深刻，事關同條三文魚搏鬥四十五分鐘才成功上釣，期間攰到頂唔順，問船家應唔應該放棄，但船家鼓勵佢千祈唔好放棄喎！
問媽打點解唔出去大海釣魚？佢好老實咁話：「出海咁大浪，我都幾十歲人咯，唔去囉！」
立法會議員張學明復活節亦會與家人到韓國首爾旅遊，順道考察當地嘅「清溪川」，睇吓可否偷師，日後研究美化元朗明渠時可派上用場；難怪學明話，今次唔算係真正旅行喎！