香港係美食天堂，識飲識食嘅港人為數唔少，東亞運籌委會委員余錦基唔止識食，仲係「食神」，佢自爆煮餸落重本，煮西班牙海鮮飯就買大堆蝦蟹「熬湯」，然後丟咗湯渣，再加入生猛海鮮煮飯，總之為求好味至上，一定唔會吝嗇啲湯渣。
余錦基尋日出席一個新書發布會，大談煮餸心得，佢話當年去德國讀書時因為要自己煮飯，自此愛上烹飪，諗起想食乜嘢就請教嗰方面嘅廚藝高手，然後匿埋喺廚房不斷嘗試，無師自通之下自成一派。
佢嘅拿手菜係煮巴基斯坦咖喱飯，仲有加入黑松露同白松露嘅意大利粉，聽見都食指大動。佢又話，妹夫近日喺新界買咗幅農地種植瓜菜，閒來攞啲新鮮蔬菜畀佢烹調，等全家大飽口福。
廚藝了得嘅仲有胡應湘太太胡郭秀萍，平日愛煮糕點、炒小菜，又會整吓魚翅同燕窩慰勞老公。佢笑言胡生身形太肥，煮餸時會刻意少油少鹽，炆肉亦會第一時間隔走啲肥油，話如果再谷肥老公，個心會好罪咎，覺得自己好似害咗佢喎，所以話呢，靚太真係唔易做㗎！