律師同會計師一樣，經濟好唔好都一樣咁好生意，好似本身係律師嘅前立法會議員李國英，淡出政壇後專注律師樓生意。佢話，對律師樓嚟講，經濟好唔好，離婚個案都一樣咁旺場，佢話經濟不景氣，家庭糾紛自然多，搞離婚不難理解，經濟好一樣有離婚問題，通常男人有個錢就身痕，最不堪就係北上包二奶，畀老婆發現自然要搞離婚啦！
佢話生意無受金融海嘯影響，但生意類型就重新組合，經濟不景氣少人買樓，拖累樓契生意急跌，除咗離婚生意激增，其次係幫客戶出律師信追數。佢又話，做新界鄉紳生意，辛酸之處不足為外人道，事關吓吓要收友情價，啲鄉紳至覺得自己有「飛士」。有時鄉紳上門諮詢有關遺囑嘅法律意見，都係得個問字，皆因大家太熟落，驚畀人知道有幾多身家！
過去幾個月，李國英同太太去咗英國參加囝囝婚禮，啱啱又去完馬爾代夫同斯里蘭卡，嚟緊會到江門探望外母大人，五月再去新加坡，六月到英國住一個月，年底再去澳洲，總之驛馬星動無時停。