辛丑牛年財運高 金銀堆滿屋
發達係好多人嘅夢想，踏入新一年梗係希望有財有勢，同時可以不勞而獲！既然係咁，就要知道自己所屬生肖今年嘅流年財運，今次請嚟梅花易數專家常歡師傅解構12生肖流年財運之餘，更教大家點樣催谷財運。
12生肖流年財運
今年嘅財運係點？呢個係每個人都會關心嘅問題，而常師傅指出每個生肖嘅流年財運雖然都唔同，但只要知道整體運勢，加上掌握旺財方位及佩戴合適催財飾物，便可以達到催旺財運嘅作用。
牛 儲錢為佳
肖牛嘅朋友因為今年犯太歲，所以財運一般，不妨趁今年增值一下，理財上亦應以儲錢為佳。今年利正南方，旺財顏色係紅色，多穿着紅色服飾，或用紅色手機殼亦有利財運。
虎 不利投資
由於有唔少凶星，出現阻滯嘅情況比較多，諸事不順，所以肖虎嘅朋友今年不利投資，宜儲錢積榖防饑。今年財位喺正北方，催財顏色為藍色，不妨着多啲藍色衫或佩戴藍色飾物。
兔 財源滾滾
今年官星高照，對肖兔嘅打工仔嚟講有升職加薪機會，做生意則有更好嘅發展，可謂財源滾滾。今年財位利正北方，旺財顏色為黑色，不妨戴副黑色框眼鏡催旺財運。
龍 出現阻滯
肖龍嘅朋友喺理財上以保守為佳，因為困擾會比較多，不論係投資或創業上，都會遇上唔同程度嘅阻滯，故此宜靜不宜動。今年財運利東南方，旺財顏色為紫色，佩戴紫色手鏈對財運會有幫助。
蛇 有利可圖
雖然去年嘅運勢相當唔錯，但今年卻變得有啲反反覆覆，同時機會亦特別多，如果審慎理財嘅話將有所獲利。肖蛇朋友今年財運利東南方，喺財位擺放木製物品有助財運，旺財顏色為綠色。
馬 切忌冒進
肖馬朋友今年嘅吉星相當多，事事順利，卻要留意時機仍未到，因此千祈唔好太過急進。今年財位喺正東方，擺放竹製物品有助催旺財運，有利顏色為青色。
羊 易有波動
肖羊嘅朋友今年沖太歲，變化會相當大，財運易出現波動，因此以穩守為佳。財運利正南方，而旺財顏色為紅色，喺財位擺放一張紅色地氈，可增強財運。
猴 支出較大
由於有顆破損星，消耗特別多，錢財容易流失，支出會比較大，今年不利投資，轉為儲錢至係穩妥嘅做法。今年嘅西南方有利肖猴朋友嘅財運，可於這個方位擺放陶瓷錢罌，而催財顏色為黃色。
雞 財運極佳
肖雞嘅朋友去年因破太歲關係，財運反反覆覆，嚟到今年唔使擔心，事關財運相當好，可以話大吉大利，並且一帆風順。今年財位喺正西方，大利顏色係啡色。
狗 穩打穩紮
凡事都以穩打穩紮為上，靜靜地搵錢，自然可以得財，少說話多做事便最為恰當。肖狗朋友今年財運利正中央，催財顏色為橙色，擺放橙色嘅擺設可催旺財運。
豬 謹慎理財
肖豬朋友今年嘅花費特別大，要小心錢財上嘅處理，以減低損財風險。今年財運利正中央，金色有助財運，喺財位擺放金色嘅時鐘能提升財運。
鼠 有名有利
今年有顆文昌星，代表有利名氣，而有名自然有利，便會化為財富。雖然並非大財，但小財已經相當唔錯。肖鼠朋友今年財位喺正西方，旺財顏色係銀色，佩戴銀器首飾最為利財。
撰文：林國豪
攝影：方偉堅
鳴謝：「玲瓏堂」梅花易數專家常歡