高達迷必買《機動戰士》 超人氣周邊產品

可愛滿瀉！吉蒂聯乘潮服系列

話說2019年適逢係《機動戰士》40周年兼女生最愛嘅Hello Kitty 45周年，上年特別推出了「Gundam vs Hello Kitty」嘅項目比試人氣，今年兩個單位繼續合力搞「2020年愛與和平的Gundam & Hello Kitty Project」，聯手推出唔少萌味十足嘅產品，最新鮮熱辣有兩個服裝品牌STRICT-G及NEW ERA搞聯乘，推出棒球Cap帽及T-shirt各兩款。Cap帽方面，一大特色係將地球聯邦軍及自護軍嘅Logo加上吉蒂蝴蝶結，並以3D刺繡表現。至於T-shirt，則分別有化身為地球聯邦軍及自護軍嘅吉蒂，再加上NEW ERA嘅Logo，感覺嬌俏可愛，啱晒女生穿着！

網址：https://www.strict-g.com/collaboration/newera

兩款Cap帽分別將地球聯邦軍及自護軍嘅Logo加上吉蒂蝴蝶結，各售￥6,050（約HK$448）。

兩款T-shirt分別有化身為地球聯邦軍及自護軍嘅吉蒂圖案，各售￥6,380（約HK$472）。

錦繪風格！老字號精美布扇

扇子除咗用來搧涼，其實亦可以作為裝飾品。於1585年開業嘅日本扇子品牌西川庄六商店，其出品除咗夠耐用輕身，扇面嘅圖案設計亦十分講究。該品牌啱啱亦跟STRICT-G搞聯乘，推出3款《機動戰士》嘅聯乘布扇，分別有浪裏高達、白波魔蟹及馬沙赤富士3款圖案，特色係圖案採用彩色版畫「錦繪」風格來繪畫，無論係充滿氣勢兼破浪而出嘅高達、被波濤包圍嘅魔蟹，抑或有赤富士作背景嘅馬沙圖案，統統都十分搶眼。而三款圖案亦同時推出T-shirt，讓大家可以着上身呢。

網址：https://www.strict-g.com/originals/japan

好有型呀！高達阿寶1:1頭盔

作為《機》片嘅男主角，阿寶嘅白色頭盔可以話係佢嘅招牌標誌之一，難得最近Full Scale Works系列將之化身為1:1嘅陳列用頭盔，高度約為25cm，採用ABS樹脂製造，難得造型及比例都盡顯動畫中嘅神髓，就連透明綠嘅遮光板亦可拆出，並特別附送陳列用台座讓你好好擺放。不過大家要留意，呢個頭盔只作陳列用，並唔適合真係戴上頭！現時網站MEGATREA SHOP及BANDAI官方購物網PREMIUM BANDAI正接受預訂，預計買家可於2021年1月下旬收貨。

網址：https://p-bandai.jp/item/item-1000147782

Full Scale Works系列將推出1:1嘅《機動戰士》阿寶頭盔，像真度真係超晒班！售價為￥30,800（約HK$2,279）。	透明綠嘅遮光板可以拆出。	白色頭盔絕對係阿寶嘅招牌標誌之一。

撰文：張超駿　

圖片：互聯網