未來趨勢日本大熱昆蟲食

蟋蟀味煎餅！入口似蝦味

喺芸芸眾多昆蟲中，成長快速、而且佔用空間及資源十分有限嘅蟋蟀成為了昆蟲食嘅首選材料。而香港人熟悉嘅無印良品，便剛於旗下網店推出蟋蟀煎餅。單睇外表跟一般煎餅並冇分別，不過製作過程中會將黃斑黑蟋蟀製成嘅粉末混入煎餅中，絕對係名副其實嘅昆蟲食。無印更話特別唔加入多餘嘅材料，令大家可以「嗒」真啲蟋蟀嘅味道！入口時你會食到一股近似蝦嘅香味，而且賣相無特別，所以大家應該唔會抗拒！不過由於蟋蟀粉含有類近蝦及蟹嘅甲殼類成分，所以對兩者敏感嘅朋友要留意！每包售¥190（約HK$13）。

網址：https://www.muji.com/jp/ja/feature/food/460936

無印良品喺旗下網店推出蟋蟀煎餅，火速成為網民熱話。

煎餅內混入咗蟋蟀粉末，入口味道類似蝦味。

世界首創！蟋蟀釀黑啤

除咗食用，蟋蟀更可以釀酒！積極開發昆蟲食嘅公司ANTCICADA，跟岩手縣遠野市嘅遠野釀造聯手，開發出世界上首款以蟋蟀為材料嘅手工黑啤酒Cricket Dark Ale。該酒以烘烤嘅黃斑黑蟋蟀及麥芽加上麥汁來釀製，充分帶出蟋蟀獨特嘅滋味，開瓶後你會聞到陣陣濃郁香氣，入口則有富層次嘅苦味，而且餘韻相當持久。適合用黑朱古力、咖啡堅果及水果乾來送酒，而且同以墨西哥煙熏辣椒烹調嘅料理味道夾到暈！早喺3月時品牌曾經開設快閃店售賣，反應相當熱烈，４日內共售出超過800杯，成績及評價均不俗。而上月起呢款啤酒於網上公開售賣，值得大家試試。6支裝（每支330ml）售¥6,400（約HK$454）。

網址：https://camp-fire.jp/projects/view/265644

ANTCICADA跟遠野釀造聯手，推出以蟋蟀為材料嘅手工黑啤酒Cricket Dark Ale。	經烘烤嘅黃斑黑蟋蟀及麥芽，發出陣陣濃郁嘅香味。	啤酒由太陽Green Energy株式會社供應嘅黃斑黑蟋蟀釀造，品質有保證。

餐廳享用！特色蟲料理

想喺餐廳享用昆蟲食嘅話，日本亦有好選擇。擁有數間分店嘅鳥獸蟲居酒屋米與Circus，其中位於涉谷PARCO嘅分店便可享用多達10種蟲蟲美味，包括有蝗蟲、蜜蜂幼蟲、蟋蟀、狄氏大田鱉、竹蟲、龍蝨及金龜子等。而且食法多多，當中以蟲芭菲最具噱頭，事關芭菲上放有原隻狄氏大田鱉，店員聲稱該蟲本身散發西洋梨般嘅果香，食用方法係利用剪刀由尾部開腹，再用匙羹吃內裏嘅內臟，帶鹹嘅味道跟雪糕同食會相當夾！如果自問只想輕嘗一下昆蟲滋味，則不妨試試混入蟋蟀成分嘅漢堡包，味道有驚喜！

網址：https://miyashitakikaku.com/store/kometocircusparco

蟲芭菲放有大大隻狄氏大田鱉，挑戰大家嘅勇氣。	素炸大具足蟲入口十分香脆，你願意品嘗嗎？	自問膽量一般又想試吓食蟲嘅話，可以試試混入咗蟋蟀嘅漢堡包。

撰文：張超駿

圖片：互聯網