「堅喪」髮型你敢剪嗎?

雖然整整齊齊的油頭是現時本地男士最主流髮型,但其實除咗千禧年開始於本地盛行的「F4頭」、「飛輪海頭」及「都敏俊頭」外,一些源自歐美的「超乎常理」髮型都曾經Hit過一輪。好似最近爆紅的紀錄片《TIGER KING》,主角Joe Exotic的堅喪髮型便是最佳例子。不過呢類髮型唔係人人Carry到,自問乜都敢試的你有勇氣剪嗎?

前短後長Mullet Hair

紀錄片《TIGER KING》爆紅,連帶紀錄片主人翁Joe Exotic的古怪髮型亦成為人氣熱話。Joe呢款前短後長、兩側剷青的髮型名叫Mullet Hair,無論是英國搖滾歌手David Bowie,抑或Paul McCartney年輕時都剪過。到近兩三年,韓國天團BIGBANG隊長G-Dragon及前EXO成員吳亦凡也挑戰過呢款髮型,可惜一樣畀人彈到體無完膚,可見連男神都難以Carry。

「雞冠頭」Mohawk

將頭髮兩邊剷光,然後將頭髮向上梳起變成雞冠的髮型叫作Mohawk。據說源自聚居於美國東北部Mohawk River周邊的民族部落Mohawk,自上世紀70s開始被英美兩地的搖滾樂團及龐克樂迷追捧,其後逐漸演變成Deathhawk、Dreadhawk及Frohawk等變奏髮型。而當中一款被稱為Liberty Spikes的髮型更是Mohawk的最強進化版,將「雞冠」分拆變成「海膽」,騎呢指數爆燈!

超難駕馭Devilock

於1977年出道的美國搖滾樂團The Misfits是當時Horror Punk搖滾班霸,隊中各員最興梳上一個名為Devilock的髮型去配襯窩釘皮革服飾。此髮型的特色是將兩側頭髮向後梳及Gel到貼服,頭頂的頭髮則往鼻梁方向Gel成一撮,個人認為比起Mullet Hair及Mohawk更難Carry,因為會嚴重影響雙眼視野及進食。

撰文:賴文曦