潮界愛高達 40周年聯乘
今年係日本人氣動畫《機動戰士GUNDAM》誕生40周年，相信高達迷都一早預計到一定會有好多限定單品鋪天蓋地推出，不出所料，年初已經率先有UNIQLO UT及CASIO G-SHOCK分別打造了12款聯名Print Tee及4款聯名腕錶，兩者官方定價尚算親民，相信不少GUNDAM Fans已經入手。如果你自問對於高達的忠誠度爆燈兼且唔介意等多兩個月左右的話，於來年1月正式推出的《機動戰士GUNDAM》× OWNDAYS聯名系列絕對值得你All In全套入手！
4款別注設計
對於喜愛遊日的讀者應該對OWNDAYS呢個日本眼鏡品牌唔會陌生，於日本國內已經坐擁過百間專門店，去年7月首度進軍香港至今亦已經發展至有10間專門店，價錢及質量同樣相當有優勢，而且品牌亦不時與日本潮流品牌如ROEN及MOBSTYLES聯名合作保持人氣。
今回趁着《機動戰士GUNDAM》開播40周年呢個大日子，OWNDAYS就出手與其合力推出共有4款聯名眼鏡的別注系列。鏡款設計以RX-78-2元祖高達、MS-06S紅彗星馬沙專用渣古II、MS-06量產型渣古II及MS-09大魔為靈感，分別將對應的色調組合運用到堅固輕巧的不銹鋼鏡框上，可以減輕長時間佩戴眼鏡的疲累感，鏡臂內側亦刻上各款機動戰士的專有型號及「GUNDAM」字樣，而鏡臂末端則有「聯邦軍」及「自護軍」標誌點綴。同時4款眼鏡亦一樣附送磁石設計的SNAP LENS太陽鏡片，方便大家快捷轉換成視光或太陽眼鏡，「千頭」的價錢可以買到「兩副」眼鏡仲要有高達聯名仲唔抵到爛？
頭像變眼鏡盒
不過若你喜愛砌高達模型時的機械感，上述4款聯名眼鏡對你來說可能只屬「配菜」，反而與眼鏡同步推出的眼鏡盒先至係真正「主菜」。事關整個1：7 RX-78-2 GUNDAM頭像造型眼鏡盒由57塊精緻零件組成，而眼睛、兩側及背面更設有位置收納6副眼鏡；當揭起「V」字天線時，眼睛部分會彈出收納位置以便放置眼鏡；將天線蓋下時更會發出音效及光芒（需用電池），設計相當霸氣。《機動戰士GUNDAM》× OWNDAYS聯名眼鏡系列及眼鏡盒同樣於明年1月正式推出，想入手眼鏡盒就要於1月指定日子在指定分店購買3副或以上眼鏡方可訂購。由於推出數量有限，高達迷唔想錯過就記得自己睇實OWNDAYS Facebook帳戶，所有預訂時間、程序及詳情將會稍後正式公布。
「高達吞拿」搶頭啖湯
雖然年初時，CASIO G-SHOCK已經搶飲頭啖湯推出了4枚《GUNDAM》聯名腕錶，但話晒都係高達40周年大日子，又點止得一間錶廠獻技咁少？ 早於今年4月，SEIKO就發表了3款與《GUNDAM》聯名合作的限量腕錶，將高達及渣古元素融入被錶迷稱為「吞拿魚」的PROSPEX腕錶中。當中RX-78-2元祖高達就用上最頂級的LX系列設計，錶殼及錶面分別以鈦合金及藍寶石水晶打造，並附送皮革錶帶以供替換，全球限量300枚，相當珍貴。另MS-06量產型渣古II及MS-06S紅彗星馬沙專用渣古II亦同樣用上Marinemaster系列腕錶設計，而鈦金屬錶殼與強化矽膠錶帶則分別採用所屬渣古顏色設計，陶瓷外殼更印上「MS-06」及「MS-06S」字樣，各全球限量1,000枚。
撰文：賴文曦
查詢電話：（A）2653 8618、（B）2312 7478