銅鑼灣包廂玩VR動感睇驗

9間獨立房

位處銅鑼灣的Hands3VR，是以VR為主題的Party Room，樓上舖內有9間獨立包廂，每間房均設有獨立房門，玩VR遊戲時就唔怕被人睇到自己個肉緊樣；而且各房的牆壁均貼有隔音棉，就算嗌到幾大聲都唔怕影響到其他玩家。至於各包廂提供的設備相近，除了電腦主機、鍵盤等基本設備，當然唔少得VR頭戴式裝置、操控手柄以及安裝於牆角的感應器。而且房內的座椅加入震動裝置，亦提供震動背心，會隨着遊戲的低音效果而震動，令臨場感大大提升。

近視冇頭暈

至於VR平台分為VIVE及Oculus兩款，前者採用無線設計，但頭戴式裝置較重；後者需要有線連接，配合較輕的頭戴式裝置，長時間佩戴都冇咁攰。場地還提供多副VR眼罩適用的眼鏡，備有不同近視度數選擇，唔怕玩到頭暈。另一賣點是會定時更新應用程式，現時有近50款應用程式及遊戲讓玩家試玩，比市面的VR Party Room更多選擇。

玩家可以穿上震動背心，加強VR實戰臨場感。	有些包廂的座椅可180度趟平作休息，椅底還加入震動裝置（小圖）。	Hands3VR營業時間：11:00am至11:00pm 收費：$150（1小時）、$270（2小時）

連線作戰推介

Hands3VR負責人Vincent推介多款連線類遊戲，可以跨平台與其他8間房的玩家，甚至網上玩家一齊對戰。「如果家長帶埋小朋友一齊玩，建議較為靜態的《Disney Movies VR》，內置多部迪士尼動畫短片，開開心心體驗VR。若果Game迷鍾意超級英雄，則推介《MARVEL Powers United VR》，屬Oculus平台獨有的角色扮演格鬥遊戲，玩家可以第一身扮演不同英雄，最多4人一組合作闖關，過足復仇者聯盟癮。想郁多啲的話，以日本虛擬歌手初音未來做主題的《Hatsune Miku VR》，是一款音樂拍子遊戲，手腳動作特別多，真係會玩到成身汗！想組隊射擊都冇問題，有射喪屍的《Dead and Buried》以及機械人大戰的《Vox Machinae》，照顧到Hardcore玩家需要。」

Oculus平台的頭戴式裝置較輕，但用上有線設計。	VIVE平台的頭戴式裝置用上無線設計，但裝置較重。	牆角安裝了各式感應器，準確量度用家動作及位置。
店內提供約50款應用程式，各式VR體驗及遊戲都有齊。	《MARVEL Powers United VR》可以畀玩家控制各個超級英雄，食正復仇者聯盟熱潮。	《Dead and Buried》玩射喪屍，第一身視覺加上喪屍撲埋嚟，相當嚇人。
《Disney Movies VR》主打輕鬆VR體驗，可以舒服咁睇吓立體短片。	《Vox Machinae》於駕駛艙內控制機械人，可供多人組隊合作闖關。

達人教路

Hands3VR負責人Vincent表示，玩VR前應要確保活動空間內沒有障礙物，減低不必要的碰撞。此外，部分玩家初接觸VR，有機會出現不習慣，但當適應後VR體驗會愈來愈精彩，建議開始時選擇動作較少的遊戲，玩了一段時間後宜作適量休息。

撰文：林子聰

攝影：張錦昌

查詢電話：9730 5661