揸筆．揸槍．揸兜

今晚同相識30餘年嘅女閨蜜食生日飯，席間提到現今社會時勢，真係不無感慨。我同女閨蜜戲言，喺依家呢個時勢，要生存基本上只有三個途徑，一係揸筆，再唔係就揸槍，最後都唔得就唯有揸兜。女閨蜜似懂非懂咁望住我笑，我繼續大發謬論，解釋何謂揸筆、揸槍同揸兜。揸筆者，係指以知識及/或專業技能謀生，尊重並遵守法律；揸槍者，是指以「拳頭」謀生，軍事強人及革命家，均是表表者；如果都唔掂，最後，當然只有揸兜啦！揸兜者，等受接濟者也！女閨蜜都未聽我講解完畢，已經笑到心花怒放，係咁話我好刻薄，好衰。跟着，我等佢話完我，再繼續解釋揸兜中所謂嘅「接濟」，接濟，喺一般人嘅眼中，其實係救濟，例如父母強力經濟支持（成功靠父幹？）、親朋戚友嘅經濟援助、政府嘅資助等。所以，聽落如果話人以揸兜維生，又真係唔係幾好聽，不過，如果大家細心諗清楚，其實我呢番謬論，係有兩個重要訊息，希望大家能夠明白：第一，活喺地球嘅我哋，都係毫不間斷咁接受緊大自然嘅「接濟」，不論空氣、水及泥土等，完全缺一不可。即係其實大家都「揸緊兜」。可惜，現代人類披着「追求科技進步」嘅狼皮，不單扼殺咗好多重要物種嘅生存空間，仲要不斷對大自然環境作出不可逆轉嘅傷害，不論係基於無知，定還是係忘記，植物學家早已提醒我哋，只要地球上嘅植物消失一秒，人類就會立即滅亡。近十年嘅天災，好多都係基於人類呢的「具建設性嘅破壞」，造成氣候轉變，令到大家都受唔到應有嘅「大自然接濟」（例如：優質嘅食水同空氣），仲要受到以前未必會影響我哋咁緊要嘅疾病或癥狀（例如：濕疹及自體免疫性疾病等）嘅困擾，諗深一層，其實有得揸兜係一種幸福。因為無論您係揸開筆，又或者揸開槍，只要您無法揸到接受「大自然接濟」嘅兜，一切就已經玩完。愛護大自然，徹底將環保融入生活，真係做多一分，都唔會嫌多。