芝麻灣行靚山踏正灘

長洲坐橫水渡前往

從市區去芝麻灣，理論上是不用搭船，但話明行大運，個「運」梗係要有咁大得咁大啦！我哋今次先由中環坐船去長洲，喺島上掃吓特色小食街檔，醫飽肚、再買埋糧水先搭橫水渡去芝麻灣。不過呢，唔好預期長洲至芝麻灣的航班好似天星小輪咁密，出發前記得睇清楚船期，唔好掛住「掃街」而錯過呀！由長洲坐船去芝麻灣，大概只需20分鐘，如果天色好，有長鏡、又眼利的話，仲可以遠攝下徑碼頭附近嘅肥豬石，趁豬年同隻大肥豬拜個年。

長洲海旁及內街有不少特色小食店，出發前可先行醫肚。	長洲往芝麻灣的航班較疏，出發前要睇清楚船期。	於芝麻灣碼頭落船後，會經過昔日懲教所的探訪室。
昔日的芝麻灣懲教所已停用，據聞其後曾用作訓練場地。	十塱灌溉水塘被綠樹環抱，景色宜人。	這條金、綠雙色的「龍尾」，已成為芝麻灣郊遊徑的地標。

龍尾未被污染

吹住海風，同友人吹吓水，很快便到達芝麻灣碼頭。落船後步行1分鐘，會見到已停用的懲教設施，經過昔日的探訪室門外，會見到一塊「此地區由警衞犬巡邏守衞」的警告牌，很令人好奇當年芝麻灣懲教所及芝新懲教所仍在運作時，芝麻灣道究竟有幾多隻警衞犬巡邏，對行山人士又兇唔兇狠o架呢？說回行程，落船後首個目的地是龍尾，沿路都有指示不難找，期間會經過被綠樹環抱的十塱灌溉水塘，也許是位置偏遠、遊人不多，山徑及水塘都未被人為污染，地上只有一團又一團的牛糞，美景猶如瑞士湖泊，要好好珍惜。大概行2公里左右，會見到金、綠雙色的龍尾狀石雕，代表已到達龍尾，也是行程的首個打卡點。

老人山 景觀極開揚

龍尾石雕有四條路連接，今次跟指示牌登上老人山，沿路上山都是梯級、梯級，同埋梯級，這就是香港山徑特色，唔想面對還是要面對。老人山高303米，雖稱不上大山，景觀卻非常開揚，山頂設有山火瞭望台，長洲、喜靈洲，以至雄偉的大東山都盡在眼前。有趣的是山頂的「老人山」牌畫咗個老翁公仔，莫非老人山真的跟老人有關係？有人認為從貝澳上望，山嶺如一位老人向天仰望而得名，但實際係點就不得而知了。沿山徑向西北方離開，要先經過老人山副峰廟仔墩先可返落貝澳，一落一上要攀升多100米左右，辛苦就算不上，可惜又是梯級咁囉。上到標高柱有大片空地，可以懶洋洋咁瞓番陣，望東灣及貝澳灣就在腳下，特別的地方是山頂有個小神壇，很有趣吧？

山頂的「老人山」牌畫咗個老翁公仔，莫非老人山同老人有關？	老人山高處擁遼闊景色，靜靜地歎海風一流。	老人山山頂設有山火瞭望台，可遠眺長洲、喜靈洲及大東山一帶景色。

落山經貝澳沙灘回程

落山繼續是無窮盡的梯級，接回芝麻灣道後（近「L126」）左轉便可返回貝澳，不但會經過美麗的沙灘，於嶼南道前的鄉郊小路上，左望更如置身非洲大草原，幾頭牛有秩序地一隻跟一隻排隊踱步，在樹林映襯下，又是另一取景好地方。行完肚仔餓？唔使愁，嶼南道很容易便會搵到茶座，當中不少店員都是外籍人士，但是同佢哋講「餐蛋麵」還是沒問題，甚至回一句「飲咩？辣椒油？」相信住香港已有一段日子了。離開時，可乘巴士往東涌或梅窩，呢個「運」夠大喇呱？

返回山腳會見到貝澳天后宮，據聞始建於1799年。	貝澳有長長的泳灘，唔游水都要影張靚相啦！	返到嶼南道前的鄉郊小路上，景觀如非洲大草原。

撰文：鄭浩文

攝影：方偉堅