Jelly Pro最細4G手機跑友保持聯繫

手機屏幕愈出愈大，體積亦相對提升，有時出街跑步或做運動，想帶埋部手機都覺得唔方便。想搵部的骰便攜嘅手機，做Gym時覆吓短訊、跑步計吓時間、遇有急事聯繫家人，依家終於有好選擇，講緊係Unihertz新抵港嘅Jelly Pro，機身面積仲細過一張八達通，重量僅73g，難怪廠方稱之為全球最細4G智能手機。

Jelly Pro
售價：$998

加推運動臂帶

近年手機廠一味追求屏幕尺寸，卻犧牲了產品便攜性。上年於Kickstarter成功集資的Unihertz就反行其道，研發出迷你手機Jelly Pro，機身體積只有92.4×43×13mm，面積比一張八達通或者提款卡仲要細，連牛仔褲的零錢小口袋都塞得落，帶出街可以話全無負擔。廠方指新機適合跑步、瑜伽等運動使用，故特別加推專用運動臂帶，當拆除臂帶後可當作手機殼使用，依家買機仲可以半價$74換購，冇理由唔入手。

支援雙卡雙待

新機外殼以塑膠物料製造，雖然手感只屬一般，但勝在夠輕身，令手機僅重73.5g。配色方面除了大路的黑、白色，仲有啱晒夏天嘅蔚藍色。最吸引是打開背殼後，用家可隨時更換950mAh電池，電力足以待機7天。另設有兩個SIM卡槽及一個記憶卡槽，可以同時擺放兩張nanoSIM卡及一張microSD卡，對應4G網絡及雙卡雙待功能，當作後備電話非常啱用。

Android系統玩Apps

作為千元有找的手機，硬件便不要抱太大期望，它採用1.1GHz四核心處理器、2GB RAM及16GB ROM，效能僅屬入門級數。比較驚喜是預載的Android 7.0系統，功能並未有任何刪減，上網、睇YouTube、下載Apps甚至串流影片統統冇問題；加上內置GPS晶片，可用作定位搵路。另一抵讚之處是系統速度，撥頁、開Apps都算爽快，不過由於屏幕只有2.45吋，使用虛擬鍵盤打字就較困難，手指粗啲都好易撳錯，建議將系統內的「字型大小」校至最大，咁樣就睇得冇咁辛苦。

新機提供黑、白及蔚藍3種配色。	備有800萬像素鏡頭，不過攝力只屬一般。	廠方同期推出手機運動臂帶，依家買機可以半價$74（原價$148）入手。
機身面積比一張八達通還要細，便攜性極高。	拆開電池後可插入SIM卡及microSD記憶卡。	Gmail、地圖等都有齊，還可透過Chrome瀏覽網頁。
以《AuTuTu》測試獲得44,022分，屬入門級數。	用家可調校系統文字大小，唔驚字型太細睇到眼花。	拍攝介面簡單，備有全景、HDR等模式。