識得保存水果Keep住「鮮」
夏天是盛產水果的季節，種類多，味道美，令人口福不淺，但有時買得太多，一時食唔晒，點樣可以令水果Keep住「鮮」？相信好多人都會搵雪櫃幫手，但其實不是所以水果都適宜冷藏，像香蕉、杧果、菠蘿（沒削皮）等熱帶水果，只需放在陰涼通爽的地方保存，不能放入雪櫃，否則會凍傷。有些水果如榴槤、牛油果等，可以放入雪櫃，但一定要先催熟，如果未熟就直接冷藏，會令它們停止變熟，更易變壞。不想催熟的話，則應放在常溫下保存。
至於火龍果、梨、荔枝、龍眼、士多啤梨、提子、山竹等，必須放進雪櫃。提提大家，提子、荔枝宜先用報紙包好，放進膠袋，綁緊後才放進雪櫃，可保存得耐一點。大家亦可將荔枝逐粒剪下來，記得要連少許蒂頭，然後用鹽水浸泡約5分鐘，撈起瀝乾，再放進膠袋，最後才冷藏，可保存得更耐。另外，士多啤梨超易爛，不可重疊擺放，入雪櫃前，最好放在鋪上廚紙的保鮮盒，以吸收多餘的水氣。
撰文：黎雅麗
攝影：張群生