運動錶雙雄智能陪跑

夏天為大地帶來美腿，人人爭住Keep Fit，但個個做運動，唔通個個都識做運動咩？最近兩間運動錶大廠不約而同推出新品，一款是可以邊跑步邊聽歌兼提供詳盡資訊的Garmin Forerunner 645 Music；另一款則擁有特長續航力及壓力測量的Suunto 3 Fitness。兩錶均可將運動數據同步至手機App，有咗「專家」幫手，做運動自然事半功倍。

Garmin Forerunner 645 Music（左）及Suunto 3 Fitness（右）分別走專業及入門路線，迎合不同運動愛好者要求。 Garmin Forerunner 645 Music 售價：$3,899起（a）；Suunto 3 Fitness 售價：$1,990起（b）

Forerunner 645 Music專業級計步

做運動一兩個鐘是等閒事，所以很多人鍾意聽歌解悶。Forerunner 645 Music最多可儲存500首歌曲，只要預先經電腦傳送及編排歌單，再接駁藍牙耳機就聽到歌；最吸引是開埋GPS模式都聽到5個鐘，夠跑一程馬拉松。它沿用同系五鍵式布局，配備穿透反射式1.2吋彩色屏幕，陽光下都睇得一清二楚。而且矽膠錶帶十分貼服，試戴時緊貼手腕便可量度心率，不過戴久了容易有壓痕及汗迹，幸好手錶支援50米防水，用水直接清洗簡單方便。

配備穿透反射式1.2吋彩色屏幕，陽光下都睇得清楚。

20mm錶帶具備易拆式設計，自行換錶帶都冇問題。

最多儲存500首歌曲，聽歌時會有專輯封面彈出。

將支援行動支付功能

針對跑友，新錶提供豐富的跑步資訊，例如步幅、步頻、垂直震幅、移動效率等，加上睇到總距離、平均配速、圈數，方便專業跑友微調訓練課程。跑步以外，它內置單車、游泳、划船及重量訓練等多個運動模式，全部可檢視有氧及無氧訓練效果，並綜合出一周訓練負荷。另對應《Garmin Connect》程式，可將運動數據同步至手機，並把Apps、Widgets小工具等下載到手錶。令人期待的是它將支援行動支付功能，輸入信用卡資料後便可用手錶畀錢，據知此服務最快今年在香港開通。

睇到距離、時間及訓練效果等，數據相當詳盡。

預計今年用到行動支付功能，用手錶便可畀錢。

可經專用App下載更多錶面設計，相當智能化。

Garmin Forerunner 645 Music 規格表

屏幕︰1.2吋（240×240解像度）

錶帶：20mm

續航力︰最長7天

防水深度︰50米

體積︰42.5×42.5×13.5mm

重量︰42.2g

Suunto 3 Fitness入門長氣錶

來自芬蘭的Suunto同樣是運動錶專家，最新的Suunto 3 Fitness配備家族式「左二右三」按鍵，並配備鍍金或拋光不銹鋼錶圈，外形時尚。圓形彩色屏幕備有218×218解像度，畫面尚算清晰。錶底的心率感應器雖然頗為凸起，但出奇地不刮手，而且毋須索緊錶帶都用到。穿戴式裝置最忌成日要充電，新錶便解決此問題，長戴10天都毋須充電，開啟GPS功能也有30小時電量，相當長氣！

屏幕約1.2吋，解像度有218×218，但錶面頗為反光。

可觀看深層睡眠時間，瞓得好唔好一睇就知！

監測睡眠質素

秉承品牌傳統，此錶適用於跑步、游泳、單車、健身室、遠足、滑雪或攀岩等多項運動，也適用於籃球、足球、排球等不同球類運動，全部可測量速度、距離，並自動計算出每日步數及卡路里。它還聯同Firstbeat Technologies開發出睡眠品質追蹤、壓力與恢復監測功能，睡眠質素及身心壓力一睇就知。同時可連接全新《Suunto》App，可從手機得知運動狀況，甚至向朋友分享GPS路徑及時間，一齊喺網上鬥Fit。